ۋيېتنام مەسىلىسى ھەققىدىكى پارىژ كېلىشىمى

تولۇق ئاتىلىشى <ۋيېتنامدا ئۇرۇشنى ئاياغلاشتۇرۇپ، تىنچلىقنى ئەسلىگە كەلتۈرۈش توغرىسىدىكى كېلىشىم>. ۋيېتنام مەسىلىسى ھەققىدىكى پارىژ يىغىنىغا قاتناشقان تۆت تەرەپ (ۋيېتنام دېموكراتىك جۇمھۇرىيىتى، ئامېرىكا، جەنۇبىي ۋيېتنام جۇمھۇرىيىتى ۋاقىتلىق ئىنقىلابىي ھۆكۈمىتى ۋە سايگون ھاكىمىيىتى) 1973 - يىل 1 ـ ئاينىڭ 27 - كۈنى پارىژدا رەسمىي ئىمزالىغان، شۇ كۈنى بۇ كېلىشىمنىڭ تۆت توختامنامىسىمۇ ئىمزالانغان. ئاساسىي مەزمونى تۆۋەندىكىلەردىن ئىبارەت: ئامېرىكا ۋە باشقا دۆلەتلەر 1954 - يىلىدىكى ۋيېتنام مەسىلىسى توغرىسىدىكى جەنۋە كېلىشىمىدە ئېتىراپ قىلىنغان ۋيېتنامنىڭ مۇستەقىللىكى، ئىگىلىك ھوقۇقى، بىرلىكى ۋە تېررىتورىيە پۈتۈنلۈكىگە ھۆرمەت قىلىدۇ؛ كېلىشىم ئىمزالانغان كۈندىن باشلاپ، پۈتكۈل جەنۇبىي ۋيېتنام زېمىنىدا ئۇرۇش توختىتىش ئىشقا ئاشۇرۇلىدۇ؛ كېلىشىم ئىمزالىنىپ 60 كۈنى ئىچىدە، ئامېرىكىنىڭ ۋە ئۇنىڭ ئىتتىپاقچىلىرىنىڭ قوشۇنلىرى ۋە ھەربىي خادىملىرى جەنۇبىي ۋيېتنامدىن پۈتۈنلەي چېكىنىپ چىقىدۇ، ئامېرىكا ئۆزىنىڭ جەنۇبىي ۋيېتنامدىكى ھەربىي ئارىلىشىشىنى داۋاملاشتۇرمايدۇ، جەنۇبىي ۋيېتنامنىڭ ئىچكى ئىشلىرىغا ئارىلاشمايدۇ، جەنۇبىي ۋيېتنام خەلقىنىڭ ئۆز تەقدىرىنى ئۆزى بەلگىلەش ھوقۇقىغا ھۆرمەت قىلىشقا كاپالەتلىك بېرىدۇ؛ جەنۇبىي ۋيېتنام خەلقى جەنۇبىي ۋيېتنامنىڭ سىياسىي ئىستىقبالىنى دېموكراتىك ئومۇمىي سايلام ئارقىلىق ئۆزى بەلگىلەيدۇ؛ ۋيېتنامنىڭ بىرلىككە كېلىشى تىنچلىق ئۇسۇلى ئارقىلىق تەدىرىجىي ئىشقا ئاشۇرۇلىدۇ.