ئۆپكە ياللۇغى

ئۇيغۇر تېبابىتىدە داۋالاش سەۋەبى: بۇ كېسەللىك، كۆكرەككە سوغۇق ئۆتۈش ۋە ئۆپكە كۆۋۈكچىلىرى سىرغىپ چىقىش سەۋەبىدىن كېلىپ چىقىدۇ. ئالامىتى: جىددىي ھالدا توڭۇپ تىترەش، قىزىتىش، نەپەس قىيىنلىشىش، كۆكرەك ئاغرىش، يۆتىلىپ دات رەڭلىك بەلغەم تۈكۈرۈش قاتارلىق ئالامەتلەر بىلەن ئىپادىلىنىدۇ. 1 - رېتسېپ 】تەركىبى【 بىنەپشە 100 گرام، نېلۇپەر، قىزىلگۈل، كاسىنە ئۇرۇقى، شاھتەررە، ئەنگۈرشىپا، ھەمىشىباھار 25 گرامدىن، گاۋزىبان، چىلان، سەرپىستان، بېھى ئۇرۇقى، قارا سۇنا ئۇرۇقى، قاپاق ئۇرۇقى مېغىزى 10 گرامدىن، تەرەنجىبىن، گۈلقەنت 120 گرامدىن. 】تەييارلاش ئۇسۇلى【 گۈلقەنت بىلەن تەرەنجىبىننى ئايرىم قاچىغا، قالغان دورىلارنى بىرلەشتۈرۈپ ئايرىم قاچىغا ئېلىپ سۇغا چىلاپ قويۇپ، ئىككى سائەتتىن كېيىن ئۈستىگە ئالتە چىنە سۇ قۇيۇپ، يېرىمى قالغۇچە قاينىتىپ، بىنەپشىنى سېلىپ بىر ئۆرلىتىپلا ئېلىپ تەييارلىنىدۇ. 】ئىشلىتىش مىقدارى【 كۈنىگە ئۈچ قېتىم، ھەر قېتىمدا 50 مىللىلىتىردىن 100 مىللىلىتىرغىچە ئىستېمال قىلىنىدۇ. 2 - رېتسېپ 】تەركىبى【 زۇپا، شۇمشا سەككىز گرامدىن، پىرسىياۋشان، بەدىيان يىلىتىزى پوستى، چۈچۈكبۇيا يىلتىزى 12 گرامدىن، ئۇرۇقسىز قىزىل ئۈزۈم 16 گرام، رۇببىسۇس سەككىزگرام، چىڭسەي ئۇرۇقى، ئارپىبەدىيان، بىخ كەبىر 20 گرامدىن، ئەنجۈر قېقى 15 تال، شېكەر 500 گرام. 】تەييارلاش ئۇسۇلى【 دورىلارنى چىلاشقۇدەك سۇغا بىر سوتكا چىلاپ قويۇپ قاينىتىپ، تەمى چىققاندىن كېيىن سۈزۈپ ئېلىۋېتىپ، شېكەر بىلەن قاينىتىپ قىيام تەييارلىنىدۇ. 】ئىشلىتىش مىقدارى【 كۈنىگە ئۈچ قېتىم، ھەر قېتىمدا 20 گرامدىن ئىستېمال قىلىنىدۇ (بالىلارغا ئازايتىلىدۇ). 3 - رېتسېپ 】تەركىبى【 زىغىر 90 گرام، قەدمانە 30 گرام، ھەسەل مەلۇم مىقداردا. 】تەييارلاش ئۇسۇلى【 دورىلارنى يۇمشاق سوقۇپ، ئەلگەكتىن ئۆتكۈزۈپ، ھەسەل بىلەن يۇغۇرۇپ تەييارلىنىدۇ. 】ئىشلىتىش مىقدارى【 كۈنىگە بىر قېتىم، يەتتە گرام دورىنى مۇۋاپىق مىقداردا ئەرىقى گاۋزىبان بىلەن قوشۇپ ئىستېمال قىلىنىدۇ.