قۇربان بارات

ئۇيغۇر مەشھۇر شەخسلىرى شائىر قۇربان بارات 1946 - يىل 10 - ئايدا ئاتۇش شەھىرىنىڭ ئاغۇ يېزىسىدا دېھقان ئائىلىسىدە تۇغۇلغان، باشلانغۇچ - ئوتتۇرا مەكتەپلەرنى ئاتۇشتا تاماملاپ، 1958 - يىلى سابىق شىنجاڭ پېداگوگىكا ئىنىستىتۇتىنىڭ تىل - ئەدەبىيات فاكۇلتېتىغا ئوقۇشقا كىرگەن، 1962 - يىلى ئوقۇش پۈتتۈرۈپ، <شىنجاڭ گېزىتى> ئىدارىسىدا مۇخبىر، مۇھەررىر، 1970 - يىلدىن باشلاپ كورلىدىكى شىنجاڭ شىنخۇا 2 - باسما زاۋۇتىدا كوررېكتور بولۇپ ئىشلىگەن. ئۇ، 1980 - يىلدىن باشلاپ شىنجاڭ خەلق نەشرىياتىدا، 1985 - يىلدىن باشلاپ، شىنجاڭ ياشلار - ئۆسمۈرلەر نەشرىياتىدا مۇھەررىرلىك بىلەن شۇغۇللانغان، ھازىر پىنسىيدە. قۇربان باراتنىڭ ئەدەبىي ئىجادىيەت پائالىيىتى 1956 - <قەشقەر گېزىتى> دە ئېلان قىلىنغان <كاككۇك> ناملىق شېئىرى بىلەن باشلانغان. ئۇ، شۇنىڭدىن ئېتىبارەن شېئىر ئىجادىيىتى بىلەن شۇغۇللىنىپ، <كەچكۈز لىرىكىسى>، <يىللار توغرۇلۇق ناخشا>، <كېسىلگەن توغراق>، <دەريا شارقىرايدۇ قاراڭغۇلۇقتا>، <پەرۋانە توغرۇلۇق ناخشا>، <قار گۈلى>، <خار قىلالماس ئۇنى ھايۋانلار> قاتارلىق يۈزلىگەن لىرىك شېئىرلارنى؛ <گۈدۈك>، <قىزىلگۈل>، <ئاسىيا ئاسمىنىدا چاقنىغان يۇلتۇز>، <ئاق روماللىق پەرىزات>، <تۈندە ئۇچقان يالغۇز قۇش>، <ئىنسان ۋە زېمىن>، <مەن ئەقىل ئىزدەيمەن> قاتارلىق داستانلارنى يېزىپ، ئۆزىنىڭ يۈكسەك شېئىرىي ماھارىتىنى، ئىپادىلەش سەنئىتىنى نامايان قىلغان ھەم ئۇيغۇر شېئىرىيىتىنىڭ تەرەققىياتى ئۈچۈن مۇناسىپ تۆھپە قوشقان. ئۇنىڭ بىر مۇنچە شېئىر - داستانلىرى مەملىكەتلىك، ئاپتونوم رايونلۇق مۇكاپتلارغ ئېرىشكەن. قۇربان بارات ئۆز نۆۋىتىدە يەنە ئىقتىدارلىق ئەدەبىي تەرجىمان. ئۇ، ھازىرغىچە شەيخ سەئىدىنىڭ <بوستان>، <ئا. س پۇشكىننىڭ چۆچەكلىرى>، لېرمۇنتوۋنىڭ <داستانلار>، <ئەي چىڭ شېئىرلىرىدىن تاللانما> قاتارلىق بىر تۈركۈم داڭلىق ئەسەرلەرنى مۇۋەپپەقىيەتلىك تەرجىمە قىلىپ چىققان. قۇربان بارات كلاسسىك ئەسەرلەرنى نەشرگە يەييارلاش ئىشلىرى بىلەنمۇ شۇغۇللىنىپ، <دىۋان ئاتايى>، <دىۋان سەككاكى>، <دىۋان نۆبىتى>، <دىۋان زوھۇرى>، <لۇتفى غەزەللىرى> نى ۋە ناۋائىينىڭ <سەددى ئىسكەندەر> داستانىنى نەشرگە تەييارلاپ ئېلان قىلغان. قۇربان باراتنىڭ ھازىرغىچە نەشر قىلىنغان ئەسەرلىرىدىن <يېشىل ھايات> (1981 - يىل، شىنجاڭ خەلق نەشرىياتى) ناملىق شېئىرلار - داستانلار توپلىمى، <ئاق روماللىق پەرىزات> (1984 - يىل، شىنجاڭ ياشلار - ئۆسمۈرلەر نەشرىياتى) ناملىق داستانلار توپلىمى، <قار گۈلى> (1993 - يىل، شىنجاڭ خەلق نەشرىياتى) ناملىق شېئىرلار - داستانلار توپلىمى قاتارلىقلار بار. ئۇنىڭ <يېشىل ھايات> توپلىمى 1987 - يىلى خەنزۇچىغا تەرجىمە قىلىنىپ، نەشر قىلىنغان. قۇربان بارات ھازىر كاندىدات ئالىي مۇھەررىر، جۇڭگو يازغۇچىلار جەمئىيىتىنىڭ ئەزاسى، جۇڭگو ئاز سانلىق مىللەت يازغۇچىلىرى ئىلمىي جەمئىيىتىنىڭ دائىمىي ھەيئەت ئەزاسى، شىنجاڭ يازغۇچىلار جەمئىيىتىنىڭ ئەزاسى.