پولىمورفىزم

بىئولوگىيە ئوخشاش بىر تۈردىكى ھاشاراتنىڭ مورفولوگىيىلىك تۈزۈلۈشى ۋە ياشاش ئىقتىدارىنىڭ ئوخشىمىغان ئۈچ خىل ياكى تېخىمۇ كۆپ خىل ئىندىۋىد بولۇپ ئىپادىلىنىش ھادىسىسى، مەسىلەن، كۆپ پىتنىڭ ئەركەك، چىشىسى پەرقلىق بولۇپلا قالماستىن بەلكى يەنە قاناتلىق - قاناتسىز، يالغۇز ئانىلىقتىن تۇغىدىغان (ئاتىسىز كۆپىيىش) ۋە جىنسلىق تۇخۇم تۇغۇپ كۆپىيىدىغان تىپتىكى خىللىرى بولىدۇ. ئىجتىمائىي خاراكتېرلىك توپلىشىپ ياشايدىغان تۈرلىرىدە پولىمورفىزم ئالاھىدە روشەن بولۇپ، ئوخشىمىغان تىپتىكى ئىندىۋىدلىرىنىڭ مورفولوگىيىسى ۋە فىزىئولوگىيىلىك رولى يۇقىرى دەرىجىدە ئالاھىدىلەشكەن بولىدۇ. مەسىلەن، ھەسەل ھەرىسىدە ئانا ھەرە (ھەرە پادىشاھى)، ئاتا ھەرە (ئەركەك ھەرە) ۋە ئىشچى ھەرىدىن ئىبارەت ئوخشىمىغان ئۈچ خىل ئىندىۋىد بولىدۇ. ئانا ھەرە مەخسۇس تۇخۇم سېلىشقا مەسئۇل بولۇپ، ئۇنىڭ گۈل چېڭى يىغىش ئاپپاراتى، موم بېزى قاتارلىقلارنىڭ ھەممىسى رۇدىمېنتلىشىپ كەتكەن. ئىشچى ھەرە كۆپىيەلمەيدىغان چىشى ھەرە بولۇپ، گۈل چېڭى يىغىش، ئۇۋا ياساش، لىچىنكا بېقىش قاتارلىقلارغا مەسئۇل. ئۇنىڭدا تەرەققىي قىلغان چايناپ شورىغۇچى ئېغىز ئاپپاراتى، گۈل چېڭى يىغىش ئاپپاراتى قاتارلىق تۈزۈلۈشلەر بولىدۇ، بىراق كۆپىيىش سىستېمىسى رۇدىمېنتلىشىپ كەتكەن بولىدۇ. تۇخۇم سېلىش ئاپپاراتى ئالاھىدىلىشىپ زەھەر سۇيۇقلۇقىنى ئوكۇل قىلىدىغان ئامبۇر تىكەنچىگە ئايلانغان. چۈمۈلىلەردە ئانا چۈمۈلە، ئەركەك چۈمۈلە ۋە ئىشچى چۈمۈلىلەر بولىدۇ، بەزىدە يەنە ئىشچى چۈمۈلىنىڭ شەكىل ئۆزگەرتىشىدىن كەلگەن لەشكەر چۈمۈلىلەرمۇ بولىدۇ.