ئىسلاھات گېزىتى تەرەپدارلىرى

دۇنيا تارىخى ⅩⅨ ئەسىرنىڭ ئوتتۇرلىرىدىكى فرانسىيىدىكى جۇمھۇرىيەتچىلەر گۇرۇھىنىڭ بىرى. <ئىسلاھات گېزىتى> 1843 - يىلىدىن 1850 - يىلىغىچە پارىژدا نەشىر قىلىنغان گېزىت. بۇ گېزىتنىڭ مۇھەررىرى لېدروروللىن ۋەكىللىكىدىكى ئۇششاق بۇرژۇئازىيە دېموكراتىك جۇمھۇرىيەتچىلىرى لۇئى بلان ۋەكىللىكىدىكى ئۇششاق بۇرژۇئازىيە سوتسىيالىزمچىلىرى بىلەن بىرلىشىپ، <ئىسلاھات گېزىتى> نى مەركەز قىلغان جۇمھۇرىيەتچىلەر گۇرۇھىنى شەكىللەندۈرگەن. ئۇلار ئومۇم سايلام ھوقۇقىنى ئەمەلگە ئاشۇرۇش، ئىجتىمائىي ئىقتىسادىي ئىسلاھات ئېلىپ بېرىش، ئىشچىلار ئاممىسىنىڭ تۇرمۇشىنى ياخشىلاش قاتارلىق تەلەپلەرنى ئوتتۇرىغا قويغان. 1848 - يىلى فېۋرال ئىنقىلابى مەزگىلىدە لېدروروللىن بىلەن لۇئى بلان 11 كىشىلىك ۋاقىتلىق ھۆكۈمەتكە قاتناشقان. لۇئى بوناپارت ھاكىمىيەت بېشىدا تۇرغاندا ھاكىمىيەت ئورگانلىرىدىن سىقىپ چىقىرىلغان.