لېتسىتىن

بىئولوگىيە بۇ كونا نامى، ھازىرقى نامى <فوسفاتىدىل خولىن> (phosphatidyl cholines)، <خولىن فوسفوگلىتسېرىد> (cholinephospho giyceride) دەپمۇ ئاتىلىدۇ. ئۇ گلىتسېرىن ياغ كىسلاتاسى، فوسفوخولىنلاردىن تۈزۈلىدۇ. سۇنى ئىنتايىن ئاسان سۈمۈرىدىغان ئاق، مومسىمان ماددا. ئۇنىڭدىكى تويۇنمىغان ياغ كىسلاتاسى ناھايىتى تېز ئوكسىدلىنىدۇ، ئۇنىڭدىكى خولىننىڭ ئىشقارلىق خۇسۇسىيىتى كۈچلۈك بولۇپ، ناترىي گىدروكسىدىغا سېلشتۇرۇش مۇمكىن. جانلىقلار دۇنياسىغا كەڭ تارقالغان، مېڭە، سپېرما سۇيۇقلۇقى، بۆرەك ئۈستى بېزى ۋە قىزىل قان ھۈجەيرىسىدە مىقدارى مول بولىدۇ. ھايۋان ئورگانىزمىدىكى ياغلارنىڭ مېتابولىزمىنى كونترول قىلىش، ياغلاشقان جىگەرنىڭ ھاسىل بولۇشىنىڭ ئالدىنى ئېلىش رولىغا ئىگە. ئاتسېتىل خولىن نېرۋىدىكى بىر خىل يەتكۈزگۈچى ماددا، نېرۋىدا قوزغىلىشنىڭ يەتكۈزۈلۈشى بىلەن مۇناسىۋەتلىك بولىدۇ. خولىن بەدەندىكى ھەر خىل مېتىل يۆتكەش رېئاكسىيىلىرىنى مېتىل رادىكالى بىلەن تەمىنلەيدۇ.