لانسىڭ ئىسى كېلىشىمى

دۇنيا تارىخى ئامېرىكا دۆلەت ئىشلىرى كاتىپى لانسىڭ (1864 - 1928) بىلەن ياپونىيە تولۇق ھوقۇقلۇق ۋەكىلى ئىسى كىكوشىرو ئۆز ئارا ئالماشتۇرغان دىپلوماتىك ھۆججەت. بىرىنچى دۇنيا ئۇرۇشى مەزگىلىدە، ياپونىيەنىڭ جۇڭگوغا قاراتقان سىياسىتى ئامېرىكىنىڭ جۇڭگودىكى مەنپەئىتى بىلەن توقۇنۇشۇپ قالغان. 1917 -يىلنىڭ 9 - ۋە 10 - ئايلىرىدا ئىسى ئامېرىكىغا بېرىپ، لانسىڭ بىلەن سۆھبەت ئۆتكۈزگەن. ئىسى لانسىڭدىن ياپونىيە بىلەن جۇڭگونى ئارىسىدا بىرخىل <ئالاھىدە مۇناسىۋەت>نىڭ مەۋجۇتلۇقىنى، ياپونىيەنىڭ جۇڭگودا <ئالاھىدە مەنپەئەت> تىن بەھرىمان بولۇشى لازىملىقىنى ھەمدە جۇڭگونىڭ ئىچكى تەرەققىياتىغا نىسبەتەن <ئالاھىدە ھوقۇق ۋە مەجبورىيەت> لەرگە ئىگە ئىكەنلىكىنى ئېتراپ قىلىشنى تەلەپ قىلغان. 11- ئاينىڭ 2 - كۈنى ئىككى تەرەپ كېلىشىم ھاسىل قىلغان، بۇ كېلىشىمنىڭ ئاساسىي مەزمونى: ئىككى دۆلەت ھۆكۈمەتلىرى جۇڭگودا <ئىشكنى ئېچىۋېتىش> ۋە <پۇرسەت تەڭ - باراۋەر بولۇش> پرىنسىپىغا ئەمەل قىلىشنى قايتا تەكىتلەيدۇ، <جۇڭگو زېمىنىنىڭ پۈتۈنلۈكى> گە كاپالەتلىك قىلىدۇ؛ <ئامېرىكا ھۆكۈمىتى ياپونىيىنىڭ جۇڭگودا، بولۇپمۇ جۇڭگونىڭ ياپونىيىگە قاراشلىق جايلارغا قوشنا قىسىمىدا، ئالاھىدە مەنپەئىتىنىڭ بارلىقىنى ئېتراپ قىلىدۇ>دېگەندىن ئىبارەت. بۇ، ئامېرىكا بىلەن ياپونىيە ئۆز ئارا تىل بىرىكتۈرۈپ، جۇڭگونى قۇربان قىلىدىغان بىر كېلىشىم ئىدى.