كۆكتات مەھسۇلاتىنى ئاشۇرىدىغان خىسلەتلىك دورا

يېزا ئىگىلىك بىلىملىرى پەمىدۇر، لازا، تەرخەمەك، پىدىگەن قاتارلىق كۆكتاتلارنىڭ چېچىكى كۆپ ئېچىلسىمۇ، ئەمما ئاز مېۋىلەيدۇ، نۇرغۇن چېچەك ۋە غۇنچىلار پىشماي تۇرۇپلا تۆكۈلۈپ كېتىدۇ. ھازىر دېھقانچىلىق ئالىملىرى بىر خىل دورا سۇيۇقلۇقىنى كەشىپ قىلدى، ئۇنى قەلەم بىلەن چېچەككە تەگكۈزۈپ قويسىلا چېچەكنىڭ تۆكۈلۈپ كېتىشىنىڭ ئالدىنى ئېلىپ، مېۋىنىڭ ئۆسۈشىنى ئىلگىرى سۈرگىلى، بۇنىڭ بىلەن كۆكتات مەھسۇلاتىنى ئاشۇرغىلى بولىدۇ. بۇ خىل «خىسلەتلىك دورا» ئۆسۈملۈك ھورمونىدىن ئىبارەت. ئۆسۈملۈك ھورمونىنىڭ تۈرلىرى ئىنتايىن كۆپ، مەسىلەن، تەبىئىي ھورمون تۈرىدىكى ئۆستۈرگۈچى ھورمونلاردىن گىببېرېللىن، ستوكىنىن، ئۈچەك ھورمونى قاتارلىقلار بار، سۈنئىي بىرىكتۈرۈلگەن ھورمونلاردىن D -4 ،2 ، نافتىل ئاتسېتات كىسلاتا، ۋوندراكىس، خلورو خولىن خلورىد، ئېتېفون قاتارلىقلار بار. تەبىئىي ھورمونلار ئۆسۈملۈكلەرنىڭ ئۆزىدە پەيدا بولغان بىر خىل ماددا ئالمىشىش ھاسىلاتى بولۇپ، ئۇنىڭ تەركىبى ئىنتايىن ئاز، كۆپىنچە مىكروگرام (مىليوندىن بىر گرام) ئارقىلىق ھېسابلىنىدۇ. سۈنئىي سىنتېزلانغان ھورمونلار ئۆسۈملۈكلەرنىڭ ئۆسۈشىنى تەڭشىگۈچى دورا دەپمۇ ئاتىلىدۇ، ئۇ تەبىئىي ھورموننىڭ قۇرۇلمىسىغا تەقلىد قىلىپ سۈنئىي ئۇسۇلدا سىنتېزلانغان، رولى تەبىئىي ھورموننىڭ رولىغا ئوخشىشىپ كېتىدىغان ماددىلاردۇر. كۆكتاتقا ئېتېفون ھورمونى كۆپ ئىشلىتىلىدۇ. ئېتېفون ئېرىتمىسى ئۆسۈملۈك توقۇلمىسىغا كىرگەندىن كېيىن، ئېتېن ئاجرىتىپ چىقىرىپ، پەمىدۇر قاتارلىق زىرائەتلەرنىڭ مېۋىسىنى رەڭ ئالدۇرىدۇ ھەمدە پىشىشىنى تېزلىتىدۇ، تەرخەمەك، كاۋا قاتارلىق كاۋا، قاپاق تۈرىدىكى كۆكتاتلارنىڭ ئانىلىق چېچىكىنى كۆپلەپ بارلىققا كەلتۈرۈپ ھەم مەھسۇلاتنى ئاشۇرىدۇ، ھەم بالدۇر پىشۇرىدۇ، شۇنداقلا ئادەم، چارۋىلار ئۈچۈن بىخەتەر، زەھەرسىز. D -4 ،2 مۇ كۆكتاتقا كۆپ ئىشلىتىلىدىغان ھورمون. ئۇ ئۆسۈملۈكنىڭ ئۆسۈشىنى تەڭشەش دورىسى، شۇنداقلا ئىچىگە سۈمۈرۈلىدىغان ياۋا ئوت - چۆپ يوقىتىش دورىسى. ئۇنىڭ تۆۋەن قويۇقلۇقتىكى ئېرىتمىسى ئۆسۈملۈكنىڭ ئۆسۈشىنى غىدىقلاپ، ماددا ئالمىشىشقا تەسىر كۆرسىتىدۇ، بىر قىسىم فىزىئولوگىيىلىك فۇنكسىيىلەرنى غىدىقلاپ ئۇلغايتىپ، چېچەكنىڭ تۆكۈلۈشىنى ئازايتىپ، مېۋە چۈشۈش نىسبىتىنى ئۆستۈرۈپ، مېۋىنىڭ ئۆسۈشىنى تېزلىتىدۇ ھەمدە بالدۇر پىشۇرىدۇ. D -4 ،2 نىڭ يۇقىرى قويۇقلۇقتىكى ئېرىتمىسى ئۆسۈملۈكنىڭ ئۆسۈشىنى تىزگىنلەش ھەمدە ياۋا ئوت - چۆپلەرنى يوقىتىش رولىنى ئوينايدۇ، ئۇ ئىچىگە سۈمۈرۈلىدىغان بىرقەدەر ياخشى ياۋا ئوت - چۆپ يوقىتىش دورىسى. كۆكتات ئىشلەپچىقىرىشىدا D -4 ،2 ئاساسلىقى ئۆسۈشنى تەڭشەش دورىسى قىلىنىدۇ، پىدىگەن تۈرىدىكى ۋە قوغۇن - تاۋۇز تۈرىدىكى كۆكتاتلارغا ئۇلارنىڭ غۇنچىلىرىنىڭ تۆكۈلۈپ كېتىشىنى كونترول قىلىش مەقسىتىدە ئىشلىتىلىدۇ. ئۆسۈملۈك ھورمونىنى ئىشلىتىشنىڭ پۈركۈش، مېۋىگە سۈرۈش، مېۋىنى چىلاش، چېچەككە تەگكۈزۈش، چېچەككە سۈرۈش، چېچەككە پۈركۈش قاتارلىق ئۇسۇللىرى بار، مەيلى قايسى خىل ئۇسۇل قوللىنىلمىسۇن، قويۇقلۇقىنى توغرا تەڭشەشكە دىققەت قىلىش لازىم، ئۇنداق بولمىغاندا ناچار تەسىر بېرىدۇ، شۇنىڭ بىلەن بىللە، ئىلمىي پەرۋىشكە بىرلەشتۈرۈش كېرەك، بولمىسا خىسلەتلىك دورا ئۈنۈمىنى يوقىتىدۇ.