爱姆斯急电

دۇنيا تارىخى ئېمىس جىددىي تېلېگرامى پرۇسسىيە - فرانسىيە ئۇرۇشىغا سەۋەب بولغان تېلېگرامما. ⅩⅨ ئەسىرنىڭ ئوتتۇرلىرىدا، فرانسىيە بىلەن پرۇسسىيە ياۋرۇپاغا زومىگەرلىك قىلىش ھوقۇقىنى تالىشىپ ئۇرۇش قوزغىماقچى بولۇشقان، بۇ چاغدا ئىسپانىيىدە تەخت ۋارىسى مەسىلىسى پەيدا بولغان. 1870 - يىلى 6 - ئايدا، پرۇسسىيە ھوھېنزوللېرن خان جەمەتىدىن شاھزادە لېئوپولد (1835 - 1905) ئىسپانىيەنىڭ تەكلىپىنى قوبۇل قىلىپ، بۇ دۆلەتنىڭ تەختىگە ۋارىسلىق قىلماقچى بولغان. 7 - ئايدا، فرانسىيە قارشىلىق قىلغانلىقتىن قايتىپ كەتكەن. 7 - ئاينىڭ 13 - كۈنى، فرانسىيەنىڭ پرۇسسىيىدە تۇرۇشلۇق ئەلچىسى گراف بېنېدېتتى (1817 - 1900) گېرمانىيەنىڭ غەربىدىكى دەم ئېلىۋاتقان جايى ئېمىستا پرۇسسىيە كورۇلى ۋىليام Ⅰ بىلەن كۆرۈشۈپ، ۋىليامدىن ھوھېنزوللېن خان جەمەتنىڭ مەڭگۈ ئىسپانىيە تەختىگە ۋارىسلىق قىلماسلىقى توغرىسىدا فرانسىيەگە ۋەدە بېرىشنى تەلەپ قىلغان، بۇ تەلەپ سىلىق سۆزلەر بىلەن رەت قىلىنغان. كېيىن ۋىليام Ⅰ ۋەقەنىڭ جەريانىنى سىلىق سۆزلەر بىلەن تېلېگرامما ئارقىلىق بېرلىندىكى باش ۋەزىر بىسماركقا خەۋەر قىلغان. بىسمارك فرانسىيەنى ئۇرۇش قىلىشقا قۇترىتىش ئۈچۈن، تېلېگراممىنى قەستەن ئۆزگەرتىپ، ئىغۋاگەرچىلىك سۆزلەرنى قوشۇپ ئېلان قىلىپ، فرانسىيەنىڭ غەزىپىنى قوزغىغان. ناپولېئون (3) 7 - ئاينىڭ 19 - كۈنى پرۇسسىيەگە ئۇرۇش ئېلان قىلغان، شۇنىڭ بىلەن پرۇسسىيە - فرانسىيە ئۇرۇشى پارتلىغان.