ئون ئىككى كىشىلىك كومىتېت

دۇنيا تارىخى 十二人委员会 shí èr rén wěi yuán huì فرانسىيە بۇرژۇئا ئىنقىلابى دەۋرىدە گىروندېچىلار تەشكىللىگەن تەكشۈرۈش كومىتېتى. بۇ كومىتېت 12 ئادەمدىن تەركىب تاپقانلىقى ئۈچۈن، 12 كىشىلىك كومىتېت دەپ ئاتالغان. 1793 - يىلى ئەتىيازدا، گىروندېچىلار بىلەن ياكۇبىنچىلار ئوتتۇرىسىدىكى كۈرەش كۈندىن - كۈنگە كەسكىنلىشىپ كەتكەنىدى. گىروندېچىلار مارات ئۈستىدىن شىكايەت قىلىپ مەغلۇپ بولغاندىن كېيىن، مىللىي كېڭەشمىدىكى گىروندېچى پارلامېنت ئەزالىرى <12 كىشىلىك كومىتېت> تەشكىللەپ، پارىژ كوممۇناسىنىڭ ھەرىكىتىنى تەكشۈرۈشكە مەسئۇل بولغان ھەمدە كوممۇنانىڭ مۇئاۋىن باش تەپتىشى ھېبېرتنى قولغا ئېلىش توغرىسىدا بۇيرۇق چۈشۈرۈپ، قاتتىق قارشىلىققا ئۇچرىغان. 5 - ئاينىڭ 27 - كۈنى مىللىي كېڭەش <12 كىشىلىك كومىتېت> نى ئەمەلدىن قالدۇرۇش لايىھىسىنى ماقۇللىغان. ئىككىنچى كۈنى گىروندېچىلارنىڭ تەلىپى بىلەن يەنە ئەسلىگە كەلتۈرۈلگەن، 5 - ئاينىڭ 31 - كۈنى ياكوبىنچىلار پارىژ خەلقىنى قوزغىلاڭ كۆتۈرۈشكە سەپەرۋەر قىلىپ، مىللىي كېڭەشنى قورشاپ، <12 كىشىلىك كومىتېت> نى ئەمەلدىن قالدۇرۇشنى ۋە گىروندېچى پارلامېنت ئەزالىرىنى قوغلاپ چىقىرىشنى تەلەپ قىلغان. مىللىي كېڭەش يەنە بىر قېتىم <12 كىشىلىك كومىتېت> نى ئەمەلدىن قالدۇرۇشقا مەجبۇر بولغان. بىراق گىروندېچى پارلامېنت ئەزالىرىنى قوغلاپ چىقىرىشنى رەت قىلغان. نەتىجىدە پارىژ خەلقىنىڭ 2 - ئىيۇن قوزغىلىڭى كېلىپ چىققان ۋە گىروندېچىلارنىڭ ھۆكۈمرانلىقى ئاغدۇرۇپ تاشلانغان.