—مەنبە
يېڭى تۇغۇلغان بوۋاقلاردىكى ئۆپكە ياللۇغىنى كەلتۈرۈپ چىقىرىدىغان ئامىللار قايسىلار؟
نېمە ئۈچۈن
يېڭى تۇغۇلغان بوۋاقلاردىكى ئۆپكە ياللۇغى تۇغۇلۇشنىڭ ئالدى - كەينىدىكى دەۋردە بوۋاقلاردا ئۆلۈشنى كەلتۈرۈپ چىقىرىدىغان مۇھىم سەۋەب، ئادەتتە ئىككىگە بۆلۈنىدۇ:
1. سۈمۈرۈش خاراكتېرلىك ئۆپكە ياللۇغى. تۆرەلمە بالىياتقۇدا ياكى تۇغۇلۇش جەريانىدا باش سۈيى، تۆرەلمە تەرىتى ياكى تۇغۇت يول ئاجراتمىلىرىنى سۈمۈرۈۋېلىش ياكى تۇغۇلغاندىن كېيىن سۈت سۈمۈرۈۋېلىش قاتارلىقلار كەلتۈرۈپ چىقارغان ئۆپكە قىسمىدىكى ياللۇغ.
2. يۇقۇملىنىش خاراكتېرلىك ئۆپكە ياللۇغى. تۇغۇتتىن ئىلگىرىكى، تۇغۇت جەريانىدىكى ۋە تۇغۇتتىن كېيىنكى يۇقۇملىنىش خاراكتېرلىك ئۆپكە ياللۇغىنى كۆرسىتىدۇ. تۇغۇتتىن ئىلگىرىكى يۇقۇملىنىش تۇغۇت جەريانى باشلىنىشتىن بۇرۇن تۆرەلمە ئاللىبۇرۇن يۇقۇملىنىپ بولۇشنى كۆرسىتىدۇ. دائىم كۆرۈلىدىغان سەۋەبى تۆرەلمە قېپى بالدۇر يېرىلغاندا چوڭ ئۈچەي تاياقچە باكتېرىيىسى قاتارلىق ئوكسىگېندىن قاچقۇچى باكتېرىيە ھەم قان ئېرىتكۈچى زەنجىرسىمان شار باكتېرىيىسى قاتارلىقلار جىنسىي يولدىن يۇقىرىغا ئۆرلەپ باش سۈيىنى بۇلغايدۇ ياكى زور ھۈجەيرە ۋىرۇسى، سوغان ۋىرۇسى قاتارلىق كېسەل قوزغاتقۇچىلار ئانا تېنى ئارقىلىق بالا ھەمراھىدىن ھامىلىنىڭ قان ئايلىنىشىغا ئۆتۈپ ئۆپكىگە بېرىپ ھامىلىنىڭ يۇقۇملىنىشىنى كەلتۈرۈپ چىقىرىدۇ، تۇغۇتتىكى يۇقۇملىنىش تۇغۇت جەريانىدا كېلىپ چىققان يۇقۇملىنىش بولۇپ، كۆپ كۆرۈلىدىغان كېسەللەندۈرگۈچى باكتېرىيە چوڭ ئۈچەي تاياقچە باكتېرىيىسى قاتارلىق ئوكسىگېندىن قاچقۇچى باكتېرىيە، قان ئېرىتكۈچى زەنجىرسىمان شار باكتېرىيە، تراخوما خىلامىدىيىسى، زور ھۈجەيرە ۋىرۇسى قاتارلىقلارنى ئۆز ئىچىگە ئالىدۇ. تۇغۇتتىن كېيىنكى يۇقۇملىنىش تۇغۇتتىن كېيىن كېسەل قوزغاتقۇچىلار نەپەسلىنىش يولى ياكى قان ئايلىنىش سىستېمىسىدىن يېڭى تۇغۇلغان بوۋاقلارنىڭ ئۆپكىسىگە بېرىپ يۇقۇملىنىشنى كەلتۈرۈپ چىقىرىدۇ. كۆپىنچە ئۈزۈمسىمان شار باكتېرىيە، چوڭ ئۈچەي تاياقچە باكتېرىيىسى، قان ئېرىتكۈچى زەنجىرسىمان شار باكتېرىيە ھەم نەپەس يولى ۋىرۇسى قاتارلىقلار كەلتۈرۈپ چىقىرىدۇ.
