ۋاتىكان يۇقىرى دەرىجىلىك دىنىي ئىشلار يىغىنى

دۇنيا تارىخى 梵蒂冈高级教务会议 fàn dì gāng gāo jí jiào wù huì yì كاتولىك چېركاۋى ۋاتىكاندا چاقىرغان دۇنياۋى خاراكتېرلىك ئالىي دىنىي ئىشلار يىغىنى. جەمئىي ئىككى نۆۋەت چاقىرىلغان. بىرىنچى نۆۋەتلىك 1869 - يىلى 12 - ئايدىن 1870 - يىلى 10 - ئايغىچە رىم پاپاسى پىئۇس Ⅸ تەرىپىدىن چاقىرىلغان. بۇ 20 - قېتىملىق كاتولىك دىنى ۋەكىللەر يىغىنى. ⅩⅨ ئەسىرنىڭ 60 - يىللىرىدا، ئىتالىيىدە بىرلىككە كەلتۈرۈش ھەرىكىتى تېز تەرەققىي قىلغان، پاپا پىئۇس Ⅸ ئۇنىڭغا قارشىلىق قىلىشقا ئۇرۇنغان ھەمدە پاپانىڭ ئىناۋىتىنى ئۆستۈرۈشكە ۋە چېركاۋنىڭ ھوقۇقىنى كۈچەيتىشكە ئۇرۇنغان. 1868 - يىلى 6 - ئايدا دىنىي ھاكىمىيەت مەڭگۈ ساقلىنىدىغانلىقى ھەققىدىكى مۇقەددەس يارلىق جاكارلانغان. 1869 - يىلى 12 - ئايدا كاتولىك دىنى يۇقىرى دەرىجىلىك خادىملىرىنىڭ يىغىلىشى چاقىرىلىپ، ترېنتو دىنىي يىغىنىنىڭ پۈتۈن قارارى توغرا دەپ قايتا تەكىتلەنگەن، ماتېرىيالىزم، ئەقلىيچىلىك، ناتۇرالىزم، خۇداسىزلىق ئەيىبلەنگەن، كاتولىك دىنى بىردىنبىر ھەقىقەت دەپ تەرغىپ قىلىنغان. 1870 - يىلى 7 - ئايدا <پاپنىڭ خاتاسىزلىقى> ئەقىدىسى ماقۇللىنىپ، پاپا ھوقۇقىنىڭ ھەممىدىن ئۈستۈن تۇرىدىغانلىقى جاكارلانغان ھەمدە كاتولىك مۇرىتلىرىنىڭ ھازىرقى زامان مەدەنىيىتىگە قارشى تۇرۇشى شەرتلىكى بەلگىلەنگەن. 9 - ئاينىڭ 20 - كۈنى ئىتالىيە قوشۇنى رىمغا كىرىش بىلەن، پاپانىڭ دەھرىي ھاكىمىيىتى بىكار قىلىنىغان، 10 - ئاينىڭ 20 - كۈنى يىغىن نائىلاج ئۈزۈلۈپ قالغان. ئىككىنچى نۆۋەتلىكى 1962 - يىلى پاپا جون ⅩⅩⅢ تەرىپىدىن چاقىرىلغان. ياندۇرقى يىلى 6 - ئايدا پاپا ئۆلۈپ كېتىپ، يېڭى پاپا پائۇل Ⅵ يىغىننى داۋاملاشتۇرغان. 1965 - يىلى ئاياغلاشقان. كاتولىك چېركاۋىنىڭ ئىچكى ئىسلاھاتى ۋە خرىستىئان مەزھەپلىرىنىڭ <بىرلىشىشى> ئاساسىي تېما قىلىنغان، <رەسىم - قائىدىلەرنى ئاددىيلاشتۇرۇش>، <چېركاۋلارنى يەرلىكلەشتۈرۈش> قاتارلىق 16 ھۆججەت ماقۇللانغان، <خرىستىئان دىنى بىرلىشىش كاتىبات باشقارمىسى>، <غەيرىي خرىستىئانلار بىلەن ئالاقىلىشىش كاتىبات باشقارمىسى>، <دىنغا ئېتىقاد قىلمايدىغانلار بىلەن ئالاقىلىشىش كاتىبات باشقارمىسى> قاتارلىقلار تەسىس قىلىنغان. شۇنداقلا گېزىت - ژۇرنال، كىنو، رادىئو، تېلېۋىزىيە قاتارلىق جامائەت پىكرى خىزمىتى كۈچەيتىلگەن. بۇ ئىككى نۆۋەتلىك يىغىن كاتولىك دىنىغا زور تەسىر كۆرسەتكەن.