سۈنئىي ئۇرۇق

يېزا ئىگىلىك بىلىملىرى ئېلىمىزنىڭ فۇدەن ئۇنىۋېرسىتېتىدىكى ئالىملار سۈنئىي شال ئۇرۇقىنى تەتقىق قىلىپ يېتىشتۈرۈپ مۇۋەپپەقىيەت قازىنىپ، ئەلا سورتلارنى تېز كۆپەيتىشنى يېڭى ۋاسىتە بىلەن تەمىنلىدى. سۈنئىي ئۇرۇق يېتىشتۈرۈشتە مەلۇم زىرائەت تۈپىدىن بىر پارچە توقۇلما كېسىۋېلىپ، ئاندىن بۇ توقۇلما لىق ئوزۇقلۇق سۇيۇقلۇقى قاچىلانغان ئۆستۈرۈش ساندۇقى ئىچىگە سېلىنسا، ئون نەچچە كۈندىن كېيىن، زور مىقداردا كۆپەيگەن ھۈجەيرە توقۇلمىلىرى كاللەكلىشىدۇ، ئارقىدىنلا بۇ كاللەكلەر ئۆزلۈكىدىن ئاجرايدۇ، ھەربىر ھۈجەيرە يېتىلىش ئارقىلىق تەدرىجىي تۆرەلمىگە ئايلىنىدۇ. بۇ خىل ئۇسۇلدا تەييارلانغان تۆرەلمە تەبىئىي ئۇرۇقتىكى تۆرەلمە - تەن ھۈجەيرە تۆرەلمىسىگە بەكمۇ ئوخشايدۇ، ئەگەر بۇلارنى سۇدا ئۇيۇيدىغان يىلىمدا مۇئەييەن چوڭ - كىچىكلىكتىكى دانچە قىلىپ ئورىساقلا سۈنئىي ئۇرۇق تەييار بولىدۇ. سۈنئىي ئۇرۇقنىڭ تەبىئىي ئۇرۇققا قارىغاندا مۇنداق بىرقانچە ياخشى تەرىپى بار: بىرىنچى، «تەن ھۈجەيرە تۆرەلمىسى» جىنسسىز كۆپىيىشنىڭ مەھسۇلى، ئۇ ئانىلىقنىڭ ئىرسىيەت خۇسۇسىيەتلىرىنى سادىقلىق بىلەن ساقلاپ، چېكىنىپ كېتىشنىڭ ئالدىنى ئالىدۇ. ئىككىنچى، كۆپىيىش سۈرئىتى تېز، مەسىلەن، گۈل ئۆسۈملۈكلىرىدىن كاڭنەيشىڭنى ئالساق، بىر دانە كاڭنەيشىڭ غولىدىن بىر يىل ئىچىدىلا1 مىليون تۈپ مايسا ئۆستۈرگىلى بولىدۇ، بۇنداق سۈرئەتكە باشقا ھەرقانداق ئۇسۇلدا يەتكىلى بولمايدۇ. ئۈچىنچى، ئەگەر ساغلام تۈپلەردىكى ھۈجەيرىلەر تاللاپ يېتىشتۈرۈلسە ھەمدە باكتېرىيىسىز شارائىتتا سىرتى ئورالسا ھېچقانداق كېسەللىك زىيانداشلىقى بولمىغان ئۇرۇققا ئېرىشكىلى بولىدۇ، بۇ ئۇرۇقتىن تارقىلىدىغان كېسەللىك زىيانداشلىقىنىڭ ئالدىنى ئېلىشتىكى ئاددىي ھەم ئۈنۈملۈك ياخشى ئۇسۇل. بۇنىڭدىن كۆرۈۋېلىشقا بولىدۇكى، سۈنئىي ئۇرۇقتا ھەل قىلىشقا تېگىشلىك نۇرغۇن تېخنىكىلىق مەسىلىلەر بولسىمۇ، لېكىن بۇ زور ئىستىقباللىق يېزا ئىگىلىك يېڭى تېخنىكىسى ھېسابلىنىدۇ.