سۇنبۇلە يۇلتۇز تۈركۈمى

خىلمۇ خىل يۇلتۇزلار سۇنبۇلە يۇلتۇز تۈركۈمى ئاسماندا ئىگىلىگەن كۆلىمى جەھەتتە، يىلان يۇلتۇز تۈركۈمىدىن قالسىلا2 - ئورۇندا تۇرىدىغان چوڭ يۇلتۇز تۈركۈمىدۇر. ئۇ شىمالدا پادىچى يۇلتۇز تۈركۈمى بىلەن، شەرقتە مىزان يۇلتۇز تۈركۈمى بىلەن، غەربتە ئەسەد يۇلتۇز تۈركۈمى بىلەن، جەنۇبتا يىلان يۇلتۇز تۈركۈمى بىلەن قوشنا، سۇنبۇلە يۇلتۇز تۈركۈمى ئېكلىپتىكادىكى12 بۇرجنىڭ بىرى ھېسابلىنىدۇ. قەدىمكى يۇنان ئەپسانىلىرىدە ئېيتىلىشىچە، سۇنبۇلە يۇلتۇز تۈركۈمى كىشىلەرنىڭ ئىززەت - ھۆرمىتىگە ئېرىشكەن مېھرىبان ئىلاھەنىڭ نامايەندىسى ئىكەن. ئۇ ئىلاھلارنىڭ پادىشاھى بولغان زېئۇسنىڭ ھەدىسى بولۇپ، ئۆسۈملۈكلەرنىڭ ئۆسۈشى ۋە دانلىق زىرائەتلەرنىڭ تېرىلىش ئىشلىرىغا مەسئۇل يېزا ئىگىلىك ئىلاھە دېمېتېر ئىكەن. كىشىلەرنىڭ تەسەۋۋۇر قىلىشىچە، ئۇ تۇغۇلۇشىدىنلا قاناتلىق ئىلاھە بولۇپ، بىر قولىدا بىر بۇغداي باشىقى، يەنە بىر قولىدا ئورغاق كۆتۈرۈۋالغانىكەن. سۇنبۇلە يۇلتۇز تۈركۈمىدىكى بىرنەچچە يورۇق يۇلتۇزنى ئۆزئارا تۇتاشتۇرساق «Y» ھەرپىنىڭ شەكلى ھاسىل بولىدۇ، بۇنىڭ ئىچىدىكى ئەڭ يورۇق يۇلتۇز α يۇلتۇزى (يەنى سپىكا) »Y« ھەرىپى ساپىقىنىڭ ئۇچىغا جايلاشقان. سۇنبۇلە يۇلتۇز تۈركۈمىدە چوڭ تىپتىكى بىر يۇلتۇزلار سىستېمىسى توپى بار بولۇپ، بۇ دەل سۇنبۇلە يۇلتۇز تۈركۈمىدىكى يۇلتۇزلار سىستېمىسى توپىدۇر. ئۇ سامانيولى سىستېمىسىغا ئوخشاش2500 دىن ئارتۇق يۇلتۇز سىستېمىسىنى ئۆز ئىچىگە ئالىدۇ، بىز بىلەن بولغان ئارىلىقى تەخمىنەن نەچچە ئون مىليون يورۇقلۇق يىلى يىراقلىقتا. سۇنبۇلە يۇلتۇز تۈركۈمىدىكى يۇلتۇزلار سىستېمىسى توپى بىزدىن شۇنداق يىراقلىقتا بولسىمۇ، لېكىن نىسپىي قىلىپ ئېيتقاندا، ئۇ بىزگە ئەڭ يېقىن يۇلتۇزلار سىستېمىسى توپىنىڭ بىرى بولۇپ ھېسابلىنىدۇ. ھازىر سۇنبۇلە يۇلتۇز تۈركۈمىدىكى يۇلتۇزلار سىستېمىسى توپى سېكۇنتىغا1150 كىلومېتىرلىق تېزلىك بىلەن يەر شارىدىن يىراقلىشىۋاتىدۇ.