—مەنبە
مايمۇننىڭ قىڭراق بىلىشى
ئۇيغۇر خەلق مەسەللىرى
مايمۇن بىر قىڭراق تېپىۋاپتۇ، ئەمما بۇ قىڭراق ناھايىتى گال بولۇپ، بىرەر تال كىچىك ياغاچنىمۇ كېسەلمەيدىكەن. ئۇ ئوتۇنچىنىڭ قېشىغا بېرىپ:
- سەن قىڭرىقىڭنى قانداق ئىتتىكلىتىسەن؟ بۇنى ماڭا ئېيتىپ بەرگەن بولساڭ، - دەپ تەلەپ قىپتۇ.
- ئۇنى تاشقا سۈركەپ ئىتتىكلىتىمەن، - دەپ جاۋاب بېرىپتۇ ئوتۇنچى.
- سۈركسىلا ئىتتىك بولامدۇ؟
- ھەئە.
مايمۇن خۇشال ھالدا ئۆيىگە قايتىپ، قىڭراقنىڭ بىسىنى تاشقا سۈركەپتۇ. تولا سۈركەۋەرگەنلىكتىن، بىسى كەينىگە يېنىپ ئارقىسى بىلەن ئوخشاش قېلىن بولۇپ قاپتۇ. ئۇ قىڭراقنى ئېلىپ ئوتۇن كەسكىلى بارغانىكەن، ئەمدى يغاچقا پەقەتلا ئۆتمەپتۇ.
- ۋوي، مەن باشقىلارنىڭ تەجرىبىسىنى ئۆگەنسەممۇ، بۇنىڭ ھېچقانداق ئۈنۈمى بولمىدىغۇ، ئەگەر ئوتۇنچىنىڭ ئېيتقىنى خاتالا بولمىسا، مەسىلە چوقۇم قىڭراقتا ئوخشايدۇ، - دەپ خۇلاسە چىقىرىپتۇ مايمۇن.
