لى جىشېن

جۇڭگونىڭ قەدىمكى قۇرۇلۇشلىرى لى جىشېن (1885 −1959 - يىللار) جۇڭگو گومىنداڭ ئىنقىلابىي كومىتېتىنىڭ رەئىسى. ئۇ گۇاڭشىنىڭ ۋۇجۇ دېگەن يېرىدە تۇغۇلغان،18 يېشىدا خۇاڭپۇ قۇرۇقلۇق ئارمىيە ئوتتۇرا مەكتىپىگە ئوقۇشقا كىرگەن،29 يېشىدا بېيجىڭدىكى قۇرۇقلۇق ئارمىيە ئۇنىۋېرسىتېتىنى پۈتكۈزگەن. كېيىن سۇن جۇڭشەن رەھبەرلىكىدىكى قانۇننى قوغداش ئۇرۇشى ۋە گۇاڭدۇڭنى بىرلىككە كەلتۈرۈش ئىنقىلابىي بازىسى كۈرىشىگە قاتناشقان.1926 - يىلى شىمالغا يۈرۈش قىلىشنى زور كۈچ بىلەن تەشەببۇس قىلغان.1927 - يىلى جياڭ جيېشىغا ئەگىشىپ، گۇاڭجۇ سىياسىي ئۆزگىرىشىنى قوزغىغان. گومىنداڭنىڭ يېڭى مىلىتارىستلىرى قالايمىقان ئۇرۇش قىلغان مەزگىللەردە، جياڭ جيېشى گۇاڭدۇڭ بىلەن گۇاڭشىنىڭ ئىتتىپاقىنى بۇزۇش ئۈچۈن، لى جىشېننى تاڭشەندە تۇتۇپ قالغان ھەمدە گومىنداڭ پارتىيىسىدىن چىقىرىۋەتكەن، كېيىن نەنجىڭغا نەزەربەند قىلغان. »18 - سېنتەبىر ۋەقەسى«دىن كېيىن ئۇنىڭ ئەركىنلىكى ۋە پارتىيىلىكىنى ئەسلىگە كەلتۈرگەن.1933 - يىلى لى جىشېن بىلەن جياڭ گۇاڭنەي، سەي تىڭكەي قاتارلىق كىشىلەر فۇجيەن ۋەقەسىنى قوزغاپ، جياڭ جيېشىغا ۋە ياپون باسقۇنچىلىرىغا قارشى تۇرىدىغان »جۇڭخۇا جۇمھۇرىيىتى خەلق ئىنقىلابىي ھۆكۈمىتى«نى قۇرغان ۋە ھۆكۈمەت رەئىسلىكىگە سايلانغان. مەغلۇپ بولغاندىن كېيىن گومىنداڭ پارتىيىسىدىن يەنە بىر قېتىم قوغلاپ چىقىرىلغان.1935 - يىلى شياڭگاڭدا جۇڭخۇا مىللەتلىرى ئىنقىلابىي ئىتتىپاقىنى تەشكىللەپ، رەئىس بولغان. «7 - ئىيۇل» ۋەقەسىدىن كېيىن، لى جىشېن پۈتۈن مەملىكەتنىڭ ياپون باسقۇنچىلىرىغا بىردەك قارشى تۇرۇشىنى تەشەببۇس قىلغان. ئۇ جەڭ مەيدانىدا پارتىيە - ھۆكۈمەت كومىتېتىنىڭ مۇئاۋىن مۇدىرلىقى ۋە گۇيلىن بەڭگۇڭتىڭىنىڭ مۇدىرلىقىنى ئۈستىگە ئالغان مەزگىلدە، نۇرغۇن كومپارتىيە ئەزالىرى ۋە ئىلغار زاتلارنى تەكلىپ قىلىپ ئىشلەتكەچكە، جياڭ جيېشىنىڭ غەزىپىنى قوزغاپ قويغان. جياڭ جيېشى ئادەم ئەۋەتىپ ئۆلتۈرمەكچى بولغان بولسىمۇ، مەقسىتى ئەمەلگە ئاشماي قالغان. ياپون باسقۇنچىلىرىغا قارشى ئۇرۇش غەلىبە قازانغاندىن كېيىن، ئۇ خې شياڭنىڭ، سەي تىڭكەي قاتارلىق كىشىلەر بىلەن بىللە جۇڭگو گومىنداڭىنىڭ دېموكراتىيىنى ئىلگىرى سۈرۈش جەمئىيىتىنى تەشكىللەپ، ئۇنىڭ رەئىسى بولۇپ سايلانغان.1946 - يىلى11 - ئايدا گومىنداڭ پارتىيىسى ئاچقان ئاتالمىش مىللىي قۇرۇلتىيىغا قاتنىشىشنى رەت قىلىپ، شياڭگاڭدا جياڭ جيېشىنىڭ مۇستەبىت ئىچكى ئۇرۇشىغا قارشى تۇرىدىغان «يەتتە تۈرلۈك پىكىر» باياناتىنى ئېلان قىلىپ، جياڭ جيېشى تەرىپىدىن ئۈچىنچى قېتىم پارتىيىدىن چىقىرىۋېتىلگەن. بۇنىڭغا قارىتا ئۇ كۈلۈپ تۇرۇپ: «ماڭا كېرەك بولغىنى بىر پارچە تاختاي ئەمەس، بەلكى ھەقىقىي ئۈچ مەسلەك» دېگەن.1948 - يىلى1 - ئايدا، ئۇ سۇڭ چىڭلىڭ قاتارلىق كىشىلەر بىلەن جۇڭگو گومىنداڭ ئىنقىلابىي كومىتېتىنى تەشكىللەپ، رەئىسلىكنى ئۈستىگە ئالغان. ئۇ جۇڭگو كوممۇنىستىك پارتىيىسى چاقىرغان يېڭى سىياسىي مەسلىھەت كېڭىشىنىڭ «1 - ماي» خىتابنامىسىگە ئاۋاز قوشۇپ شەرقىي شىمال ئازاد رايونىغا كىرىپ، جۇڭگو كوممۇنىستىك پارتىيىسىنىڭ رەھبەرلىكىنى ھىمايە قىلىدىغانلىقىنى بىلدۈرگەن.1949 - يىلى لى جىشېن يېڭى سىياسىي مەسلىھەت كېڭىشىگە قاتنىشىپ، مەركىزىي خەلق ھۆكۈمىتىنىڭ مۇئاۋىن رەئىسى بولۇپ سايلانغان. كېيىن يەنە مەملىكەتلىك خەلق قۇرۇلتىيىنىڭ مۇئاۋىن مۇدىرى ۋە مەملىكەتلىك سىياسىي كېڭەشنىڭ مۇئاۋىن رەئىسى بولغان.1949 - يىلى11 - ئايدا دېموكراتىيىنى ئىلگىرى سۈرۈش كومىتېتى، دېموكراتىيە بىرلەشمىسى ۋە گومىنداڭ ئىنقىلابىي كومىتېتى بىرلەشتۈرۈلۈپ، بىرلىككە كەلگەن جۇڭگو گومىنداڭ ئىنقىلابىي كومىتېتى قىلىپ قۇرۇلغاندا، ئۇ داۋاملىق رەئىسلىك ۋەزىپىسىنى ئۈستىگە ئېلىپ، سوتسىيالىستىك ئىنقىلاب ۋە قۇرۇلۇش ئىشلىرى، شۇنداقلا ۋەتەننىڭ تىنچ بىرلىككە كېلىشى ئۈچۈن پائال تۆھپە قوشقان.1959 - يىلى بېيجىڭدا كېسەل سەۋەبىدىن ۋاپات بولغان.