ھىندىستان مۇسۇلمانلار ئىتتىپاقى

دىنى سۆزلۈكلەر ئىسلام دىنى 印度穆斯林联盟 yìn dù mù sī lín lián méng دۇنيا تارىخى 全印穆斯林联盟 quán yìn mù sī lín lián méng ئىسلام دىنى ئىتتىپاقى دەپمۇ ئاتىلىدۇ. 1906 - يىلى 12 - ئايدا داككا (ھازىرقى بېنگالغا تەۋە) دا قۇرۇلغان ھىندىستان ئىسلام دىنى سىياسىي تەشكىلاتى. دەسلىپىدە ئەزالىرى ئاساسلىقى، سودا بۇرژۇئازلىرى، فېئودال ئاقسۆڭەكلەر، چوڭ پومېشچىكلار بولغان. مەقسىتى ۋە ۋەزىپىسى: ئەنگلىيە ھۆكۈمىتىگە سادىق بولۇپ، مۇسۇلمانلارنىڭ ھەر خىل سىياسىي ھوقۇق - مەنپەئەتلىرىنى قوغداش ۋە ئىلگىرى سۈرۈشتىن ئىبارەت. 1907 - يىلى 12 - ئايدا، كاراچىدا چاقىرىلغان بىرىنچى نۆۋەتلىك يىللىق يىغىنىدا ئىتتىپاق نىزامنامىسى تەييارلىنىپ، 1908 - يىلى 3 - ئايدا ئالېگارخ پەۋقۇلئاددە يىغىنىدا ماقۇللانغان ھەمدە ئاغاخان ئىتتىپاق رەئىسلىكىگە سايلانغان. پۈتۈن مەملىكەتنىڭ مۇھىم رايونلىرىدا ۋە ئەنگلىيىنىڭ لوندون شەھىرىدە ياچېيكا تەسىس قىلىنغان. 1913 - يىلى 3 - ئايدا لاكنوۋ يىللىق يىغىنىدا يېڭى ئىتتىپاق نىزامنامىسى ماقۇللىنىپ <باشقا دىنىي مەزھەپلەر بىلەن ھەمكارلىشىپ ھىندىستانغا مۇۋاپىق كېلىدىغان ئاپتونومىيە تۈزۈمى> نى قۇرۇپ چىقىش نىشانىنى ئوتتۇرىغا قويغان. 1915 - يىلىدىن كېيىن جىننا باشچىلىقىدىكى گۇرۇھ كونا رەھبەرلەرنىڭ ئورنىغا ئۆتۈپ، خەلق كونگرېسى پارتىيىسىگە يېقىنلىشىشقا باشلىغان ھەمدە مىللىي ھەرىكەتكە قاتناشقان. 1916 - يىلى 12 - ئايدا خەلق كونگرېسى پارتىيىسى بىلەن <لاكنوۋ ئەھدىنامىسى> نى تۈزۈپ، ھىندىستان <ئەنگلىيە ئىمپېرىيىسى ئىچىدە دومىنىئونلار بىلەن باراۋەت بولغان> مۇختارىياتكە ئىگە بولۇشى لازىم، دېگەننى بەلگىلىگەن. سايلىغۇچىلارنى دىن بويىچە ئايرىپ، ئۆز ئالدىغا سايلاشنى يولغا قويۇشنى ئىزچىل تەشەببۇس قىلغان. ⅩⅩ ئەسىرنىڭ 30 - يىللىرىدىن باشلاپ، ھىندىستاننىڭ غەربىي شىمال ۋە شەرقىي شىمال قىسىملىرىدىكى مۇسۇلمانلار كۆپ سانلىقنى ئىگىلىگەن رايونلاردا ئايرىم پاكىستان دۆلىتىنى قۇرۇشنى تەشەببۇس قىلغان. 1940 - يىلى 3 - ئايدا، لاھور يىللىق يىغىنىدا <پاكىستان قارارى> نى ماقۇللىغان. 1947 - يىلى ھىندىستان بىلەن پاكىستاننى بۆلۈپ ئىدارە قىلىشنى ئەمەلگە ئاشۇرغان. پاكىستان مۇستەقىل بولغاندىن كېيىن ھاكىمىيەت بېشىدىكى پارتىيىگە ئايلىنىپ، 60 - يىللارغا كەلگەندە ئۈچ گۇرۇھقا بۆلۈنۈپ كېتىپ، سىياسىي جەھەتتىكى ھۆكۈمرانلىق ئورنىنى يوقاتقان.