高止山

دۇنيادىكى شەھەرلەر گاتس تاغلىرى ھىندىستاندىكى دىكان ئېگىز تەكشىلىكىنىڭ شەرقى ۋە غەربىدە، شىمال - جەنۇب يۆنىلىشىدە ئورۇن ئالغان تاغلىقلار بولۇپ، بۇ ئىككى تاغ دىكان ئېگىز تەكشىلىكىنى خۇددى سوقۇپ قويغان تامدەك ئىككى تەرەپتىن قورشاپ تۇرىدۇ. بۇ تاغلىقلار جايلاشقان ئورنىغا قاراپ شەرقىي گات تاغلىرى، غەربىي گات تاغلىرى دەپ ئىككىگە ئايرىلىدۇ. شەرقىي گات تاغلىرى غەربىي گات تاغلىرىغا قارىغاندا سەل پەسرەك بولۇپ، ئوتتۇرىچە ئېگىزلىكى 600-700 مېتىرغا يېتىدۇ. شىمالدىن جەنۇبقا بولغان ئۇزۇنلۇقى 800 كىلومېتىر كېلىدۇ، غەربىي گات تاغلىرى سەل ئېگىز بولۇپ، ئوتتۇرىچە ئېگىزلىكى 1000-1500 مېتىر كېلىدۇ. ئەڭ ئېگىز ئاناي مودى چوققىسى 2695 مېتىرغا يېتىدۇ، غەربىي گات تېغى ئېگىز، شەرقىي گات تېغى پەسرەك بولغانلىقى ئۈچۈن غەربىي گات تاغلىقلىرىدىن باشلىنىدىغان كستىنا، گوداۋارى قاتارلىق نۇرغۇنلىغان دەريالار دىكان ئېگىزلىكى ۋە شەرقىي گات تاغلىقلىرىنى كېسىپ ئۆتۈپ، بېنگال قولتۇقىغا قويۇلىدۇ، شەرقىي گات تاغلىرى دېڭىزغا قاراپ پەلەمپەي ھالەتتە پەسىيىپ بارىدۇ، غەربىي گات تاغلىرى غەربتىكى ئەرەب دېڭىزغىا قاراپ تىكرەك ھالەتتە پەسىيىپ بارىدۇ، ئايرىم جايلىرىدا تار، ئۇزۇن سوزۇلغان تۈزلەڭلىكلەر بار. شەرقىي ھەم غەربىي گات تاغلىقلىرىنىڭ كۆپ قىسمى تروپىك، سۇبتوپىك ئورمانلىقلىرى بىلەن قاپلىنىپ تۇرىدۇ.