ئىت مۈشۈك دوستىنى قانداق قۇتۇلدۇردى

ئۇيغۇر خەلق مەسەللىرى ئىت بىلەن مۈشۈك دوست بوپتۇ، ئۇلار باشقا كۈن چۈشكەندە بىر - بىرىگە ياردەم بېرىشكە ۋەدىلىشىپتۇ. بىر كۈنى مۈشۈك ئېھتىياتسىزلىقتىن كۆلگە چۈشۈپ كېتىپتۇ - دە، >مېنى قۇتۇلدۇرۇڭلار!< دەپ ۋارقىراپتۇ. ئىت ئۆز دوستىنىڭ نالە - پەريادىنى ئاڭلاپ دەرھال يۈگۈرۈپ كەپتۇ ۋە مۈشۈكنىڭ كۆل ئوتتۇرىسىدا بىر لەيلەپ، بىر چۆكۈپ تۇرغانلىقىنى كۆرۈپ دەرھال كۆلنىڭ ئوتتۇرىسىغا ئۈزۈپ بېرىپتۇ - دە، مۈشۈكنىڭ بوينىدىن كۈچىنىڭ بارىچە چىشلەپ قىرغاققا قاراپ ئۈزۈپتۇ. - مىياۋ - مىياۋ، ۋايجان - ۋاييەي، يامان بولدى. مەن زادىلا بولالمىدىم...، - دەپ مۈشۈك مىياۋلىغىنىچە تېپىرلاشقا باشلاپتۇ. - ۋايجان دېگۈدەك نېمە بوپتۇ؟ نېمىگە يامان بولدى؟ مەن سېنى قۇتۇلدۇرۇۋاتىمەنغۇ؟ تولا تىپىرلىما! - دەپتۇ ئىت بىپەرۋالىق بىلەن مۈشۈكنى ئەيىبلەپ، ئۇ مۈشۈكنىڭ بوينىنى تېخىمۇ قاتتىقراق چىشلىگىنىچە قىرغاققا چىقىپتۇ. - خۇداغا شۈكرى، ئاخىر قىرغاققىمۇ چىقتىم، - دەپتۇ ئىت مۈشۈكنى يەرگە تاشلاپ، >ئۇھ< دېگىنىچە چوڭقۇر بىر تىنىپ. ئەمما مۈشۈك يەردە ياتقىنىچە قىمىرلاپمۇ قويماپتۇ. ئەسلىدە ئىت ئۇنى چىشلەپ ئۆلتۈرۈپ قويغانىكەن. - دوستۇم، ئەيىب ھەرگىز مەندە ئەمەس. مەنمۇ ۋىجدانىغا خاس ھالدا سەن ئۈچۈن كۈچۈمنىڭ بارىچە تىرىشتىم، - دەپتۇ ئىت ئۆلۈك ياتقان مۈشۈك دوستىغا قاراپ. ئىت بىردەمدىن كېيىن قۇيرۇقىنى پۇلاڭشىتقىنىچە ئۆز يولىغا راۋان بوپتۇ. ھەر قانداق ئىشتا قىزغىنلىق بولۇشى كېرەك، ئەمما يالغۇز قىزغىنلىققىلا تايىنىپ ئىشلارنى باشقا ئاچىققىلى بولمايدۇ.