ئولاۋ

دۇنيا تارىخى (968 - 1000)، نورۋېگىيە كورۇلى (995 - 1000). ھارالد ھائارفاگېر (ئالتۇن چاچلىق پادىشاھ) نىڭ چەۋرىسى. ياش ۋاقتىدا بالتىق دېڭىزىدا دېڭىز قاراقچىلىق ھەرىكىتىگە قاتناشقان. ئەنگلىيىگە ئىككى قېتىم ھۇجۇم قىلغان. مىلادى 991 - يىلى باشقا ئىككى دېڭىز قاراقچىلىرىنىڭ سەردارى بىلەن بىرلىكتە ئەنگلىيە كورۇلى بىلەن كېلىشىم تۈزۈپ، 10 مىڭ فوند - ستېرلىڭغا ئىگە بولۇپ، بىرىنچى قېتىملىق ھۇجۇمىنى ئاخىرلاشتۇرغان. 994 - يىلى 94 كېمىدن تەركىب تاپقان فلوتىنى ئىشقا سېلىپ، ئەنگلىيىگە يەنە ھۇجۇم قىلغان. 16 مىڭ فوند - ستېرلىڭغا ئىگە بولغاندىن كېيىن ئۇرۇشنى توختاتقان. 995 - يىلى نورۋېگىيىگە قايتىپ كەلگەن ھەمدە كورۇل بولغان. تەختتە تۇرغان مەزگىلدە خرىستىئان دىنىغا ئېتىقاد قىلغان ھەمدە نورۋېگىيە، ئىسلاندىيە ۋە گرېنلاندىيىنى خرىستىئان دىنىغا ئېتىقاد قىلدۇرۇشقا تىرىشقان. مىلادى 1000 - يىلى بىر قېتىملىق يىراققا يۈرۈش قىلىش سەپىرىدە بالتىق دېڭىزىدىكى سۋولدېر ئارىلىنىڭ يېنىدا شۋېتسىيە - دانىيە بىرلەشمە فلوتىنىڭ يوشۇرۇنۇپ تۇرۇپ زەربە بېرىشىگە ئۇچراپ، مەغلۇپ بولغاندىن كېيىن ئۆزىنى دېڭىزغا تاشلاپ ئۆلگەن. دۇنيا تارىخى (995 - 1030). نورۋېگىيە كورۇلى (1016 - 1029). ھارالد ھائارفاگېرنىڭ ئەۋرىسى. ياش ۋاقتىدا ئىنگلىز بوغۇزى، نورماند قاتارلىق جايلاردا دېڭىز قاراقچىلىقى بىلەن شۇغۇللانغان ھەمدە دانىيىلىكلەر بىلەن سوقۇشقان. 1015 - يىلى نورۋېگىيىگە قايتىپ كېلىپ، ئۆزىنى كورۇل دەپ ئاتىۋالغان ھەمدە بەش ئوپران قەبىلە باشلىقىنىڭ قوللىشىغا ئېرىشكەن. 1016 - يىلى نېسجىنىڭ يېنىدىكى بىر قېتىملىق دېڭىز جېڭىدە نورۋېگىيىنىڭ ئەمەلىيەتتىكى ھۆكۈمرانى گراف سىۋېئىننى مەغلۇپ قىلغان. تەختتە تۇرغان مەزگىلدە جەنۇبتىكى بەزى قەبىلە باشلىقلىرىنىڭ كۈچىنى يوقاتقان، ئاقسۆڭەكلەرنى باستۇرغان. كىشىلەرنى خرىستىئان دىنىنى قوبۇل قىلشىقا زورلىغان. ئوركنېي تاقىم ئاراللىرىغا بولغان مىتروپوللۇق ھوقۇقىنى قوغدىغان، يەنە دانىيىگە ھۇجۇم قىلىپ غەلىبە قازانغان. 1028 - يىلى دانىيە كورۇلى كىنۇد نورۋېگىيىگە ھۇجۇم قىلغاندا، نورۋېگىيە ئاقسۆڭەكلىرىىڭ قوللىشىغا ئېرىشكەن، شۇنىڭ بىلەن ئۇ روسىيىگە قېچىپ كەتكەن. 1030 - يىلى قايتىپ كېلىۋاتقاندا ئۆزىدىن ئىككى ھەسسە كۆپ دۈشمەنگە ئۇچراپ، سىدىكىلىستا جېڭىدە مەغلۇپ بولۇپ ئۆلگەن. ئۆلگەندىن كېيىن، <مۇقەددەس ئولاۋ> (نورۋېگىيىنى قوغدىغۇچى ئىلاھ) دەپ ئاتالغان.