خىروتسېفالۇس قۇرتى

بىئولوگىيە 丰年虫 fēngniánchóng قاسىراقلىقلار سىنىپىنىڭ خىروتسېفالۇس ئائىلىسىگە كىرىدۇ. تېنى ئىنچىكە، ئۇزۇن بولۇپ كىچىك راكقا ئوخشايدۇ، ئۇزۇنلۇقى تەخمىنەن 1 - 2 سانتىمېتىر، رەڭگى چىرايلىق، ئادەتتە (ئەركىكى) كۆكۈچ يېشىل، (چىشىسى) سەل قوڭۇر بولىدۇ. مۇرەككەپ كۆزى ساپاقلىق، بەدىنىنىڭ بوغۇملىرى كۆپ ھەم ئېنىق. كۆكرەك قىسمىدىكى پۇتلىرىنىڭ ھەممىسىنىڭ شەكلى ئوخشاش بولۇپ يوپۇرماقسىمان، گىرۋەكلىرىدە ئۇزۇن قىلچىق تۈكلىرى بولۇپ، ئۈزۈش ۋە ئوزۇقلۇق سۈزۈش ئورگىنى ھېسابلىنىدۇ. قورساق قىسمىدا پۇتلىرى بولمايدۇ، ئاخىرقى ئۇچىدا قۇيرۇق ئاچىسى بولىدۇ، چىشىسىنىڭ كۆكرەك قىسمى بىلەن قورساق قىسمىنىڭ چېگرىسىدا بىر تۇخۇم خالتىسى بولىدۇ. كۆپىنچە تېيىز سۇلاردا ياشايدۇ، ئۈزگەندە ئوڭدا ئۈزىدۇ، كۆرۈنۈشى ناھايىتى چىرايلىق بولۇپ، ئەتىياز، ياز پەسىللىرىدىكى يىغىلما سۇلاردا دائىم ئۇچرايدۇ. بېلىق يېمى قىلىشقا بولىدۇ.