—Reference
تىمساھنىڭ كۆز يېشى
ئۇيغۇر خەلق مەسەللىرى
تىمساھ كىچىك جانىۋارلارنى يېۋالغان چېغىدا ھامان كۆزىدىن ياش ئاقاتتى. بىر كۈنى بالا تىمساھ:
- ئانا، بىز كىچىك جانىۋارلارنى يېگەندە نېمە ئۈچۈن كۆز يېشى قىلىمىز؟ - دەپ سورىدى.
- ئەخمەق بالام، - دېدى ئانا تىمساھ، - بۇ بىزنىڭ كۆز يېشىمىز ئەمەس، بىز نەرسە - كېرەك يېگەندە، بەدىنىمىزدە ھاسىل بولغان ئارتۇقچە سۇيۇقلۇقنى كۆز ئەتراپىمىزغا جايلاشقان بەزلەر ئارقىلىق چىقىرىۋېتىمىز. باشقىلار بۇنى كۆرۈپ بىزنى يىغلىدى، دەيدۇ.
- بەزىلەر بىزنى: >ئۇلار كىچىك جانىۋارلارنى يېۋالغاندا، باغرى يۇمشاقلىق قىلىپ كۆز يېشى قىلىدۇ، ئۇلار يولۋاس، شىرلارغا ئوخشاش ۋەھشىي ئەمەس< - دەيدىكەن.
- ئەمەلىيەتتە، تۈپتىن ئۇنداق ئەمەس ئىكەن - دە - دېدى بالا تىمساھ.
- بۇ ناھايىتى ياخشى، كىشىلەر دائىم مۇشۇنداق ئوقۇشماسلىقتا كەتسۇن. مۇشۇنداق بولغاندا، ئىناۋىتىمىز يولۋاس، شىرلارنىڭكىدىن مىڭ ھەسسە ئۈستۈن تۇرىدۇ، - دېدى ئانا تىمساھ.
