سەيلە تاماشا باغچىسى

جۇڭگونىڭ باغ-ئورمانچىلىقى سەيلە - تاماشا (شادلىق) باغچىسىنىڭ ئاساسىي ئالاھىدىلىكى شۇكى، ئۇنىڭدا ئىلىم - پەن، سەنئەت، كۆڭۈل ئېچىش پائالىيەتلىرى مۇۋەپپەقىيەتلىك بىرلەشتۈرۈلگەن، ئۇ زامانىۋى تۇرمۇشنىڭ تېز رىتىمىغا ۋە ھازىرقى زامان كىشىلىرىنىڭ پسىخىكىسىغا ناھايىتى ماس كېلىدۇ. ئەگەر قەدىمكى باغ - ئورمانلار ۋە ئادەتتىكى مەنزىرىلىك باغلاردا جىمجىتلىق ئاساس قىلىنىدۇ دېيىلسە، سەيلە - تاماشا باغچىلىرىدا جانلىقلىق ئاساس قىلىنىدۇ، ئۇ ھازىر تازا تەرەققىي قىلىۋاتقان ھاياتىي كۈچكە باي يېڭىچە بىر خىل باغچىلاردۇر.1955 - يىل7 - ئايدا، دۇنيا بويىچە ئەڭ چوڭ سەيلە - تاماشا باغچىسى − دېسنىي شادلىق باغچىسى ئامېرىكىنىڭ كالىفورنىيە شتاتىدا قۇرۇلدى. بۇ باغچىنىڭ بەرپاچىسى دەل چاشقان بىلەن ئۆردەك، قار مەلىكە قاتارلىق سەنئەت ئوبرازلىرىنى ياراتقان كارتون فىلىم ئۇستازى ۋوگت دېسنىي ئەپەندىدۇر. دېسنىي شادلىق باغچىسى خۇددى چوڭ بىر سەھنىدەك دۇنيادىكى خىلمۇخىل، رەڭگارەڭ نەرسىلەرنى ئۆزىگە مۇجەسسەملەشتۈرۈپ، خۇددى چۈشتىكى خىيالىي دۇنيادەك ئۆزگىچە، ئاجايىپ - غارايىپ بىر باغچىنى بارلىققا كەلتۈرگەن، كىشىلەر بۇ يەردە كۈل قىزنىڭ قورغىنىنى تاماشا قىلالايدۇ، قەدىمكى شەھەرلەرنى ئايلىنىپ چىقالايدۇ، ئىپتىدائىي ئورمانلىققا كىرىپ ئېكسپېدىتسىيە پائالىيىتى بىلەن شۇغۇللىنالايدۇ، دېڭىز ئاستى دۇنياسىدا بېلىقلاردەك ئۈزەلەيدۇ، زۇڭتۇڭلار زالىغا كىرىپ تارىختىن بۇيانقى زۇڭتۇڭلارنىڭ ئىش ئىزلىرىدىن خەۋەردار بولالايدۇ ياكى جىن - ئالۋاستىلار بىناسىغا كىرىپ ئەرۋاھلار بىلەن كۆرۈشەلەيدۇ، تىزگىنەك بىلەن كونترول قىلىنىدىغان تەقلىدىي يىرتقۇچ ھايۋانلارنىڭ ھۇجۇمىغا ئۇچراش پۇرسىتىگىمۇ ئېرىشەلەيدۇ... ھازىر ئامېرىكا دېسنىي شادلىق باغچىسىدىن يەنە بىرنى قۇردى، ياپونىيىنىڭ توكيو شەھىرىدىمۇ دېسنىي شادلىق باغچىسىغا تەقلىد قىلىنغان باغچىدىن بىرى قۇرۇلدى. جۇڭگونىڭ گۇاڭجۇ، شاڭخەي، بېيجىڭ قاتارلىق شەھەرلىرىدىمۇ مۇشۇنىڭغا ئوخشىشىپ كېتىدىغان سەيلە - تاماشا باغچىلىرى ئارقا - ئارقىدىن قۇرۇلۇپ، چوڭ تىپتىكى ھەر خىل ئويۇن - تاماشا سايمانلىرى بارلىققا كەلدى، ئويۇن - تاماشىلارنىڭمۇ مەزمۇنى موللىشىپ تۈرى كۆپەيدى.