نېمە ئۈچۈن DVD دىكى سۈرەت VCD غا قارىغاندا تېخىمۇ سۈزۈك بولىدۇ؟

نېمە ئۈچۈن بىزگە مەلۇم، VCD بىلەن DVD كىنو - تېلېۋىزىيە پروگراممىلىرىنى ساقلايدىغان ئوپتىكىلىق دىسكا. ئۇلارنىڭ يۈزىدە نۇرغۇن كىرتىك بار، لازېر نۇرى دىسكىدىكى كىرتىككە چۈشكەندە، قايتقان نۇر ئېلېكتر سىگنالىغا ئايلاندۇرۇلۇپ، تېخنىكىلىق بىر تەرەپ قىلىنغاندىن كېيىن پروگرامما قويۇلىدۇ. DVD بىلەن VCD قارىماققا ئانچە پەرقلەنمەيدۇ، لېكىن ئەمەلىيەتتە نۇرغۇن جەھەتتە پەرقى بار. VCD غا سېلىشتۇرغاندا، DCD نىڭ كۆرۈنۈشلىرى سۈزۈك، ئاۋازى ئەينەن، <ساقلىيالايدىغان> ئۇچۇرى تېخىمۇ كۆپ، بىر VCD بىر كىنونىڭ پەقەت يېرىمىنىلا ساقلىيالايدۇ، ئەمما بىر DCD بىر قانچە كىنونى ساقلىيالايدۇ. DVD ھەر جەھەتتىن VCD دىن ئۈستۈن تۇرىدۇ. چۈنكى، ئۇنىڭغا تېخىمۇ ئىلغار تېخنىكا قوللىنىلغان. DVD نىڭ كىرتىكلىرى VCD گە قارىغاندا تېخىمۇ زىچ، ھەتتا ئۇنىڭ ئارقا يۈزىگىمۇ خاتىرىلىگىلى بولىدۇ، شۇڭا، ئۇنىڭ سىغىمى بەك چوڭ. ئوپتىكىلىق دىسكىنىڭ ھەجىمى كىچىك بولغاچقا، VCDۋە DVD دىكى ئۇچۇرلارنىڭ ھەممىسى زىچلاشتۇرۇش ئارقىلىق بىر تەرەپ قىلىنىدۇ، VCD دىكى ئۇچۇرلار <تەڭ ئاساستا> زىچلاشتۇرۇلىدۇ. ئەمما DVD دا تېخىمۇ ئىلغار <سانلىق مەلۇمات ئارقىلىق زىچلاشتۇرۇش> تېخنىكىسى قوللىنىلىدۇ، يەنى كونكرېت ئەھۋال كونكرېت بىر تەرەپ قىلىنىدۇ: ئەگەر سۈرەت ۋە ئاۋاز ئۆزگىرىشى ئاستا بولسا زىچلاشتۇرۇش دەرىجىسى چوڭ بولىدۇ، ئەگەر سۈرەت ۋە ئاۋاز ئۆزگىرىشى تېز بولسا، زىچلاشتۇرۇش دەرىجىسى كىچىكرەك بولىدۇ. شۇنىڭ بىلەن دىسكىنىڭ سىغىمى چوڭىيىدۇ، زىچلاشتۇرۇش سۈپىتى يەنىمۇ يۇقىرى كۆتۈرۈلىدۇ، سۈرەت تېخىمۇ ئوچۇق، ئاۋاز تېخىمۇ يېقىملىق بولىدۇ.