لىجياڭ يۈيلۇڭ قارلىق تېغى داڭلىق مەنزىرىلىك رايونى

تاغ ۋە دالىلار لىجياڭ يۈيلۇڭ قارلىق تېغى داڭلىق مەنزىرىلىك رايونى − يۈننەن ئۆلكىسى لىجياڭ، نىڭلاڭ، جۇڭديەن ناھىيىلىرى تەۋەسىدە بولۇپ، تۆت مەنزىرە رايونىدىن تەركىب تاپقان، ئومۇمىي كۆلىمى770 نەچچە كۋادرات كىلومېتىر. يۈيلۇڭ قارلىق تېغىنىڭ يىل بويى قار بېسىپ تۇرىدىغان13 چوققىسى بار، جەنۇبىي قىسمىدىكى ئاساسىي چوققا شەنزىتو دېڭىز يۈزىدىن5500 نەچچە مېتىر ئېگىز. يۈيلۇڭ قارلىق تېغى بىلەن خابا قارلىق تېغى ئارىلىقىغا جايلاشقان خۇتياۋشيا بوغۇزىدىكى جىلغا20 كىلومېتىرچە كېلىدۇ، دەريا يۈزىنىڭ ئەڭ تار يېرى30 مېتىرلا كېلىدۇ، دەريا ساھىلى بىلەن قىرغاقتىكى تاغ چوققىلىرىنىڭ ئېگىزلىك پەرقى تەخمىنەن3900 مېتىر بولۇپ، دۇنيادىكى ئەڭ چوڭقۇر جىلغا، چاڭجياڭ دەرياسىدىكى بىرىنچى قولتۇق بولۇپ، تارىختىن بۇيان ئىستراتېگىيىلىك نۇقتا بولۇپ كەلگەن؛ تاغ چوققىلىرى، ئاجايىپ قىيالار، كارستلىق ئۆڭكۈرلەرنى ئالاھىدىلىك قىلغان. لۇخۇ كۆلى مەنزىرىلىك رايونىدا چەكسىز ئورمان تىمتاس كۆللەر بىلەن ئاز سانلىق مىللەتلەرنىڭ ئۆرپ - ئادەتلىرى بىر گەۋدىگە ئايلانغان. لىجياڭ قەدىمىي شەھىرىدىكى پۇقرالار ھويلا - ئاراملىرى ئۆزگىچە ئۇسلۇبتا بولۇپ، ئېلىمىزنىڭ بىناكارلىق تارىخىدا مۇھىم ئورۇن تۇتىدۇ. مەنزىرە رايونىدا ناشى مىللىتى1000 نەچچە يىللار ئىلگىرى ياراتقان دۇڭبا يېزىقى، ناشى قەدىمكى چالغۇلىرى، بەيشا تام رەسىمى قاتارلىقلار بىرقەدەر يۇقىرى تارىخىي مەدەنىيەت قىممىتىگە ئىگە.