جاراھەت ساقايتقۇچى توقۇلما

بىئولوگىيە Callusئەسلى مەنىسى ئۆسۈملۈك جاراھەتلەنگەندىن كېيىن جاراھەت ئورنىدا ھاسىل بولغان يېڭى توقۇلمىنى كۆرسىتىدۇ. جاراھەتلەنگەن يۈزگە يېقىن ئورۇندىكى ھايات ھۈجەيرىلەرنىڭ جاراھەتنىڭ تەسىرىدىن بۆلۈنۈش ئىقتىدارىنى ئەسلىگە كەلتۈرۈپ، تېز ئۆسۈپ جاراھەت يۈزىنى پۈتتۈرۈشىدىن ھاسىل بولىدۇ. ئۇنىڭ سىرتقى قەۋىتى پۇرۇپكىلىشىپ جاراھەت يۈزىنى قوغداش رولىنى ئوينايدۇ. ئۇلاق ئۇلاش جەريانىدا جاراھەت ساقايتقۇچى توقۇلما ئۇلانغۇچى بىلەن ئۇلاق تېگىنى ئۆز ئارا بىرلەشتۈرىدۇ. ئۇنىڭ يەنە بىر تارماق مەنىسى - ئۆسۈملۈك توقۇلمىسىنى ئۆستۈرۈش جەريانىدا ھاسىل بولغان، بەلگىلىك تۈزۈلۈشى بولمىغان توقۇلما كاللىكىدىن ئىبارەت. ئېكتوفىتوزومىنىڭ بەزى ھۈجەيرىلىرى تەندىن ئايرىپ ئۆستۈرگەن شارائىتتا ئىندۇكسىيىلىنىپ ئەسلىگە قايتىپ، بۆلۈنۈپ ئۆسۈپ بىر توپ رەتسىز نېپىز پوستلۇق توقۇلمىنى ھاسىل قىلىدۇ. بۇ خىل توقۇلمىنىڭ بەلگىلىك سىرتقى شەكلى ۋە ئىچكى تۈزۈلۈشى بولمايدۇ، ئۇنى داۋاملىق ئۆستۈرسە ئۆزلۈكسىز ئۆسىدۇ. جاراھەت ساقايتقۇچى توقۇلما مۇۋاپىق شارائىتتا يەنە دېففرېنسىيىلىنىپ يىلتىز ۋە بىخ ھاسىل قىلىش بىلەن ئۆسۈپ ئۆسۈملۈك تۈپىگە ئايلىنىدۇ. ھەر خىل ئورگان ۋە توقۇلمىلار (ئەركىن ھۈجەيرە، پروتوپلازما، گۈل چېڭى، تۆرەلمە خالتىسى، تۆرەلمە سۈتى، تۆرەلمە قاتارلىقلارنى ئۆز ئىچىگە ئالىدۇ) ئۆستۈرۈش جەريانىدا جاراھەت ساقايتقۇچى توقۇلمىنى ھاسىل قىلىدۇ.