ئىككىدىن تۇخۇم

ئۆتكەن زاماندا جەرۇللا بىلەن خەيرۇللا دىگەن ئىككى يىگىت بىر باينىڭ ئۆيىدە يىللىقچى بولۇپ ئىشلەيدىكەن. ئۇلار كۈندۈزى ئېتىز - ئېرىق ئىشلىرىنى قىلسا، كېچىسى ئېغىلدا مال بىلەن بىرگە ياتىدىكەن. جەرۇللا بىلەن خەيرۇللا ئەتىدىن كەچكىچە ئارام ئالماي ئىشلەيدىكەن، شۇنداق بولسىمۇ باينىڭ خوتۇنى رازى ئەمەس ئىكەن. ئۇ جەرۇللا بىلەن خەيرۇللانى ئالداپ - سالداپ كۆپرەك ئىشلىتىشنىڭ كويىغا چۈشۈپتۇ. بىر كۈنى يېرىم كېچىدە باينىڭ خوتۇنى ئېغىلغا كىرىپ، جەرۇللانى ئويغىتىپتۇ - دە: - جەرۇللا پاققان تۇر، ئۆيگە كىر، مېنىڭ ساڭا سۆزۈم بار، - دەپتۇ. جەرۇللا ئويغىنىپتۇ، ھاڭ - تاڭ بىلەن باينىڭ ئۆيگە كىرىپتۇ. باينىڭ خوتۇنى پىشۇرۇلغان ئىككى تۇخۇمنى ئۇنىڭغا بېرىپ: - سەن نەچچە كۈندىن بېرى ھاردىڭ، چارچىدىڭ، بۇنى چاققان يەپ، تېزرەك ئىشڭغا ماڭ، ھە راسىت. بۇ سىرنى خەيرۇللاغا ئېيتما! - دەپتۇ. شۇنىڭ بىلەن جەرۇللا تاڭ ئاتماستىن ئۆي ئىشلىرىنى تۈگىتىپ، ئېتىزغا بېرىپ، قوناق چاناشقا مەجبۇر بوپتۇ. باينىڭ خۇتۇنى يەنە ئىككى تۇخۇم پىشۇرۇپ، ئېغىلغا كىرىپ خەيرۇللانى ئويغىتىپ: - جەرۇللا ئىشقا كەتتى، سەن ياتامىسەن؟ - دەپتۇ ۋە ئۇنىمۇ شۇ تەقلىتتە ئىشقا كۆندۈرۈپتۇ. - شۇندىن باشلاپ ئۇلار بايغا ئەنە شۇنداق ئىشلەۋېرىپتۇ. ئۇلار ئۆزلىرىنىڭ ھەر كۈنى تۇخۇم يەۋاتقانلىقىنى سىر قىلىپ يۈرۈشۈپتۇ. بىر يىلمۇ ئۆتۈپتۇ. بىر كۈنى جەرۇللا خەيرۇللاغا: - خوجايىننىڭ خوتۇنى بىزگە يامان قىلمىدى جۇمۇ، جاپا تاتساقمۇ كۈندە ئىككىدىن تۇخۇم بېرىپ تۇردى، بۇ نىمە دىگەن ياخشىلىق؟ - دەپتۇ. خەيرۇللا بۇنى ئاڭلاپ ھەريران قاپتۇ ۋە: - ئۇ ساڭىمۇ ئىككى تۇخۇم بېرىپ تۇرغانمىدى؟ قارا بۇنى! - دەپتۇ. شۇنداق قىلىپ بۇلار ئىشنىڭ تەكتىنى ئۇقۇپتۇ. ئەتىسى باينىڭ خوتۇن جەرۇللا بىلەن خەيرۇللانىڭ ھېساب، كىتابىنى قىلىپتۇ. ئۇلارنىڭ ھەر - بىرىدىن ئوتتۇز بەش جىڭدىن بۇغداي تۇتۇۋېلىپ: «بۇنى تۇخۇم پۇلى ئۈچۈن تۇتۇۋلدىم» دەپتۇ. بۇنىڭغا ئۇلار ناھايىتى خاپا بولۇشۇپتۇ. نىجىس خوتۇننىڭ قۇرغان قاپقىنىغا چۈشكەنلىكىگە بەكمۇ ئېچىنىپتۇ ۋە ئاخىرى مۇنداق قوشاق توقۇپتۇ: باينىڭ خوتۇنى، زەھەردۇر دىلى، بىزنى ئالدىدى. جادىگەر قېرى.