ئىسكەندەر بىي

دۇنيا تارىخى 斯坎德培 sī kǎn dé péi (تەخمىنەن 1405 - 1468)، ئەسلى ئىسمى گېئورگې كاستروتى. ئالبانىيىنىڭ مىللىي قەھرىمانى. كاستروتى جەمەتىدىن كېلىپ چىققان بولۇپ، دادىسى ئالبانىينىڭ ئوتتۇرا قىسمىدىكى بىر كىنەز. ئالبانىيە ⅩⅤ ئەسىرنىڭ 20 - 30 - يىللىرى تۈركىيە تەرىپىدىن بېقىندۇرۇلغان. گېئورگې تەخمىنەن 1423 - يىلى گۆرۈگە ئېلىنغان ئادەم سۈپىتدە تۈركىيە سۇلتانىنىڭ ئوردىسىغا ئەۋەتىلگەن، ئۇ ئىسلام دىنىغا ئېتىقاد قىلىپ، ئىسمىنى ئىسلام دىنىدىكى ئىسىم ئىسكەندەرگە ئۆزگەرتكەن، كېيىن يەنە تۈركىيە قوشۇنىدا خىزمەت قىلىپ <بەگ> دەپ نام ئالغان، شۇنىڭ بىلەن ئىسكەندەر بەگ دەپ ئاتالغان. 1443 - يىلى 300 نەپەر ئاتلىق ئەسكەرنى باشلاپ قوزغىلاڭ كۆتۈرۈپ، ئالبانىيىنىڭ ئوتتۇرا قىسمىدىكى قورغان كرۇيەنى ئىشغال قىلغان. ىەلق ئاممىسى ۋە ھەرقايسى جايلارنىڭ كىنەزلىرى ئۇنىڭغا كەينى - كەينىدىن ئاۋاز قوشقان. 1444 - يىلى جايلارنىڭ كىنەزلىرىنى بىرلەشتۈرۈپ، <ئالبانىيە ئىتتىپاقى> نى قۇرغان. شۇنىڭدىن كېيىنكى 20 نەچچە يىلدا، ئۇ ئالبانىيە خەلقى ۋە قوشۇنىغا رەھبەرلىك قىلىپ، تۈركىيە سۇلتانى مۇرات Ⅱ بىلەن مۇھەممەد Ⅱ نى بىر قانچە قېتىم، يەنى 1444، 1448، 1450، 1457 - ۋە 1466 - 1467 - يىللىرى مەغلۇپ قىلغان. ئىسكەندەر بەگ رەھبەرلىك قىلغان ئالبانىيە خەلقىنىڭ تۈركىيىگە قارشى تۇرۇپ، ۋەتەننى قۇتقۇزۇش كۈرىشى، ۋېنگرىيە قاتارلىق ئەللەر خەلقلىرىنىڭ تۈركىيىلىكلەرنىڭ تاجاۋۇزچىلىقى، كېڭەيمىچىلىكىگە قارشى كۈرىشىگە كۈچلۈك ياردەم بەرگەن