野蔷微

شىنجاڭنىڭ ئۆسۈملۈكلىرى ئازغان بۇ ئەتىرگۈل ئائىلىسىدىكى كۆپ يىللىق، ئازغانغا ئۇرۇقداش چاتقال بولۇپ، ئېگىزلىكى ئۈچ مېتىر ئەتراپىدا كېلىدۇ؛ غولى كۆپ شاخلايدۇ، كىچىك تىكىنى بولىدۇ؛ يوپۇرمىقى نۆۋەتلىشىپ ئۆسىدۇ، تاق سانلىق پەيسىمان مۇرەككەپ يوپۇرماق بولۇپ، شەكلى سوقىچاق ياكى تەتۈر تۇخۇمسىمان، گىرۋەكلىرى ھەرە چىشلىرىغا ئوخشاش بولىدۇ؛ گۈلى يەككە ھالدا يان شاخلىرىنىڭ ئۇچىدا ئۆسىدۇ، گۈلىنىڭ سېپىدە زىچ تىكەنسىمان تۈكلىرى بار، گۈل كاسسا ياپراقچىلىرى بەش تال، گۈل تاجى ياپراقچىلىرى بەش تال بولۇپ، رەڭگى سۇس قىزىل ياكى سېرىق كېلىدۇ. مېۋىسى سوقىچاق، پارقىراق، گۆشلۈك، رەڭگى قىزىل بولىدۇ. دورىغا بۇ ئۆسۈملۈكنىڭ مېۋىسى، يىلتىزى ۋە چېچىكى ئىشلىتىلىدۇ. بۇ ئۆسۈملۈكنىڭ چېچەكلىگەندە چېچىكىنى، مېۋىسى پىشقاندا مېۋىسىنى، كەچ كۈزدە يىلتىزىنى كولاپ يىغىۋېلىپ، ئاپتاپتا قۇرۇتۇپ تەييارلىنىدۇ. دورىغا ھۆل ھالەتتىمۇ ئىشلىتىلىدۇ. شىنجاڭ ئۇيغۇر ئاپتونوم رايونىنىڭ ھەرقايسى جايلىرىدىكى تاغلىق دەريا ۋادىلىرى، ئورمانلىقنىڭ ئايىغىدىكى چاتقاللىقلاردا ئۆسىدۇ. قۇرۇق سوغۇق. ئىچ سۈرۈشنى توختىتىش، سۈيدۈك قېتىم سانىنى ئازايتىش، مەنىينى چىڭىتىش، قاننى سوۋۇتۇش، ھەيزنى راۋانلاشتۇرۇش، ئاغرىق توختىتىش خۇسۇسىيىتىگە ئىگە. ئەھۋالغا قاراپ مېۋىسى 6 ~ 12 گرام، يىلتىزى 15 ~ 30 گرام ئەتراپىدا ئىشلىتىلىدۇ. 20 گرام ئازغاننى سۇدا قاينىتىپ ئىچىپ بەرسە، كۆپ ئېھتىلام بولۇش، كۆپ سىيىش، سوزۇلما خاراكتېرلىك ئىچ سۈرۈش، ئاق خۇن كۆپ كېلىش، ئۆزلۈكىدىن تەرلەش، ئوغرى تەر ۋە بەل، پۇت ئاغرىقى قاتارلىق كېسەللىكلەرگە مەنپەئەت قىلىدۇ. 20 ~ 30 گرام ئازغان يىلتىزىنى سۇدا قاينىتىپ ئىچىپ بەرسە، يىقىلىپ زەخىملىنىش، بەل، پۇت سىرقىراپ ئاغرىش، سوزۇلما خاراكتېرلىك ئىچ سۈرۈش ۋە يۆتەل قاتارلىق كېسەللىكلەرگە مەنپەئەت قىلىدۇ. مۇۋاپىق مىقداردىكى ئازغان يىلتىزىنى يۇمشاق سوقۇپ، سۇدا نەملەپ خېمىر قىلىپ يەرلىك ئورۇنغا چېپىپ بەرسە، چىيقانغا ياخشى مەنپەئەت قىلىدۇ.