—参考资料
تال ۋە بېدىش
ئۇيغۇر خەلق مەسەللىرى
دېھقاننىڭ ھويلىسىدىكى ئۈۈم تېلى مۇستەھكەم بېدىش ئۈستىگە ئۆزىنى تاشلاپ، مەغرۇر سوزۇلۇپ يېتىپ كۆپكۆك يوپۇرماقلىرى ۋە مەرۋايىتتەك ئۈزۈم ساپاقلىرىغا قاراپ قويۇپ، بېدىشنى مەسخىرە قىلىشقا باشلىدى:
- ھە، بېدىش، كۈن نۇرىدا قۇرۇپ كەتكەن قوۋزىقىڭغا قارىغىنا، نېمىدېگەن سەتلىشىپ كەتكەن!
بېدىش بۇ ھاقارەتنى ئاڭلاپ، تەمكىن قىياپەتتە:
- سەن مېنىڭ كۈن نۇرىدا قارىداپ كەتكەن قوۋزىقىم ئىچىدىكى مەزمۇت ياغىچىمنىڭ كۈچى بىلەن قەددىڭنى كۆتۈرۈپ، مۇشۇنداق باراقسان بولدۇڭ. مەن بولمىغان بولسام، يەردە دەسسىلىپ كەتكەن بولاتتىڭ، - دەپ سۆزلىدى.
بېدىشنىڭ ئورۇنلۇق جاۋابى بىلەن دەككىسىنى يەپ ئوڭايسىزلانغان تال يەنە گەپ يورغىلىتىشقا تەمشىلىۋىدى، يوپۇرماقلار ئارىسىدا بېدىش ياغىچىغا تايىنىپ تۇرغان بىر ساپ ئۈزۈم:
- ئەي تال، ئۇنچىۋالا كۆرەڭلەپ كەتمە، بېدىش بولمىسا، سېنىڭ ھالىڭمۇ خاراب بولاتتى، مەنمۇ شېرىن بولۇپ يېتىشەلمەس ئىدىم، - دەپ سۆزلەپ كەتتى.
تال بۇ گەپلەرنى ئاڭلاپ گەپ تاپالماي، دۇدۇقلاپ يۈزى قىزاردى.
