مېكسىكا دۆلەتلىك ئىنسانشۇناسلىق مۇزېيى

مۇزېي ۋە مەدەنىيەت سارايلىرى بۇ ئىندىئانلارنىڭ4000 يىلدىن بۇيانقى مەدەنىيەت مىراسلىرىنى ساقلايدىغان، تەتقىق قىلىدىغان ۋە كۆرگەزمە قىلىدىغان ئىنسانشۇناسلىق مۇزېيىدۇر. ھەرقايسى دۆلەتلەردىن كەلگەن ساياھەتچىلەر مېكسىكىغا بېرىپ ئىنسانشۇناسلىق مۇزېيىنى ئېكسكۇرسىيە قىلمىغانلىق خۇددى مىسىرغا بېرىپ ئەلئېھرامنى كۆرمىگەندەك ئەپسۇسلىنارلىق ئىش، دېيىشىدۇ. مۇزېينىڭ كۆرگەزمە مەزمۇنى «قەدىمكى مەدەنىيەت مىراسلىرى»،«ھازىرقى زامان ئىندىئانلىرىنىڭ تۇرمۇشى» دىن ئىبارەت ئىككى چوڭ قىسىمنى ئۆز ئىچىگە ئالىدۇ. ئېكسكۇرسىيە لىنىيىسىنىڭ ئۇزۇنلۇقى بەش كىلومېتىردىن ئاشىدۇ. يەنە كېلىپ كۆرگەزمە بۇيۇملىرىنىڭ مىقدارى كۆپ، مەزمۇنى مول بولۇپ، بارلىق كۆرگەزمە بۇيۇملىرىنى كۆرۈپ چىقىشقا توپتوغرا بىر كۈن ۋاقىت كېتىدۇ. قەدىمكى مەدەنىيەت يادىكارلىقلىرى قىسمىدا12 كۆرگەزمىخانا بار. بىرىنچى كۆرگەزمىخانىدا ئىنسانشۇناسلىققا دائىر ئادەتتىكى بىلىملەر تونۇشتۇرۇلىدۇ. ئىككىنچى كۆرگەزمىخانىدا ئوتتۇرا ئامېرىكا قىتئەسى قەدىمكى مەدەنىيىتىنىڭ ئاساسىي خاراكتېرى تونۇشتۇرۇلىدۇ، ئۇنىڭ مەزمۇنى قەدىمكى ھەر مىللەت ئىندىئان خەلقىنىڭ تاش ھەيكەل، تاش ئويمىچىلىق، ئۆي - ئىمارەت، تام رەسىمى، ئاسترونومىيە، كالېندارچىلىق، دەپنە قىلىش تۈزۈمى قاتارلىق ۋەكىللىك خاراكتېرگە باي ئەمەلىي بۇيۇم ۋە مودېللارنى ئۆز ئىچىگە ئالىدۇ. ئۈچىنچى كۆرگەزمىخانىدىن12 كۆرگەزمىخانىغىچە بولغان توققۇز كۆرگەزمىخانىنىڭ ھەممىسىگە قەدىمكى مېكسىكىنىڭ ھەرقايسى رايونلىرىنىڭ مەدەنىيىتىگە دائىر كۆرگەزمە بۇيۇملىرى قويۇلغان بولۇپ، ئۇلار ئوۋچىلىق، تېرىقچىلىق، ئولتۇراقلىشىش، ئىبادەتخانا ئىمارەتلىرى، مەركىزىي شەھەرلەرنىڭ شەكىللىنىشى قاتارلىق ھەر خىل مەدەنىيەتلەرنىڭ تەرەققىيات جەريانىنى ئۆز ئىچىگە ئالىدۇ. ئىنچىكىلىك بىلەن ئويۇلغان تاش ئابىدە، تاش ئويمىلار، شەكلى ھەر خىل، قۇرۇلمىسى مۇرەككەپ بولغان ھەر خىل ئىبادەتخانىلار، داڭلىق كوكۇلگان تاش ھەيكىلى ۋە خىلمۇخىل ساپال قورچاق، ساپال بۇيۇملار سىرلىق مايا مەدەنىيىتىنىڭ جەلپكارلىقىنى نامايان قىلىپ، ئادەمنىڭ كۆزىنى قاماشتۇرىدۇ. ئېغىرلىقى24 توننا كېلىدىغان قۇياش كالېندارى ئويۇلغان تاش «پۈتكۈل مۇزېينىڭ كۆزى» دەپ ئاتالغان بولۇپ، ئۇ ئازتىك مەدەنىيىتىنىڭ بىردىنبىر سىمۋولى ھېسابلىنىدۇ. بۇنىڭدىن باشقا، مۇزېيغا يەنە ھەر مىللەت ئىندىئان خەلقىنىڭ مىللىي كىيىم - كېچەكلىرى ۋە قول ھۈنەرۋەنچىلىك بۇيۇملىرى قويۇلغان بولۇپ، ئىندىئانلارنىڭ كۈندىلىك تۇرمۇشى ۋە ئۆي - ئىمارەتلىرى نامايان قىلىنغان. كىشىلەر مېكسىكا دۆلەتلىك ئىنسانشۇناسلىق مۇزېيىنى مېكسىكىنىڭ قەدىمكى مەدەنىيىتىنى چۈشىنىشتىكى كۆزنەك، دەپ قارايدۇ. پەقەت مۇشۇ مۇزېي ئارقىلىقلا قەدىمكى ئىندىئانلار ياراتقان پارلاق مەدەنىيەتنىڭ ئومۇمىي قىياپىتىنى كۆرگىلى بولىدۇ.