يۇلتۇزسىمان تەنچە

بىئولوگىيە ھايۋان ھۈجەيرىلىرى ۋە تۆۋەن دەرىجىلىك ئۆسۈملۈك ھۈجەيرىلىرىنىڭ يىپلىق بۆلۈنۈش جەريانلىرىدا مەركىزىي تەنچە (دانىچە) نى ئورىغان ھالدا ھاسىل بولىدىغان يۇلتۇزسىمان تۈزۈلۈشتۇر، يەنى مەركىزىي تەنچە (دانىچە) نىڭ تۆت ئەتراپىدىن قىسقا مىكرو نەيچىلەرگە مەنسۇپ بولغان يۇلتۇزسىمان يىپچىلەر چېچىلىپ چىقىپ تۇرىدۇ. يۇقىرى دەرىجىلىك ئۆسۈملۈك ھۈجەيرىلىرىنىڭ يىپلىق بۆلۈنۈشى جەريانىدا مەركىزىي تەنچە (دانىچە) كۆزىتىلمىگەن بولسىمۇ، لېكىن يەنىلا يۇلتۇزسىمان تەنچىلىك تۈزۈلۈشنى كۆرۈش مۇمكىن. يۇلتۇزسىمان تەنچە ئۇرچۇقسىمان تەنچىنىڭ ھاسىل بولۇشى ۋە ھۈجەير بۆلۈنۈشىنىڭ كېيىنكى مەزگىلىدە خروموسومىلارنىڭ ئىككى قۇتۇپقا قاراپ سىلجىشىغا نىسبەتەن مۇھىم رول ئوينىشى مۇمكىن. <مەركىزىي دانىچە>، <يىپلىق بۆلۈنۈش> گە قاراڭ.