بىر پارچە تۆمۈر

ئۇيغۇر خەلق مەسەللىرى بىر پارچە تۆمۈر ئوچاققا تاشلانغاندىن كېيىن: - كۆيۈپ ئۆلىدىغان بولدۇم! كۆيۈپ ئۆلىدىغان بولدۇم! - دەپ ۋارقىراپتۇ. - مەنلا سېنىڭ قەلبىڭنى ساپ قىلىپ تاۋلاپ چىقالايمەن، - دەپتۇ ئوت. قىپقىزىل تۆمۈر پارچىسى سەندەل ئۈستىگە قويۇلۇشىغىلا بازغان ئۇنى شىددەت بىلەن ئۇرۇشقا باشلاپتۇ. تۆمۈر پارچىسى يەنە: - ۋاي يانجىلىپ ئۆلىدىغان بولدۇم! يانجىلىپ ئۆلىدىغان بولدۇم! - دەپ ۋارقىراپتۇ. - پەقەت ئۇرۇش ئارقىلىقلا سېنى كېرەكلىك ماتېرىيال قىلىپ چىققىلى بولىدۇ، - دەپتۇ بازغان. تۆمۈر پارچىسى بازغاننىڭ ئۇرۇۋېرىشى نەتىجىسىدە ناھايىتى تېزلا بىر ئورغاق بولۇپ سوقۇلۇپ چىقىپتۇ. يېڭى پۈتكەن ئورغاق سۇغا تىقىلىپتۇ. - ۋاي، تۇنجۇقۇپ ئۆلىدىغان بولدۇم! تۇنجۇقۇپ ئۆلىدىغان بولدۇم! - دەپ زارلاپتۇ ئورغاق يەنە. - سەن ماڭا چۆكسەڭلا ئاندىن قاتتىق سۈركىلىشكە بەرداشلىق بېرەلەيدىغان، بىسىڭ مەڭگۈ قايرىلمايدىغان بولىسەن، - دەپتۇ سۇ كۈلۈپ تۇرۇپ.