ئەختەم ئۆمەر

ئۇيغۇر مەشھۇر شەخسلىرى ياش يازغۇچى ئەختەم ئۆمەر 1963 - يىل 10 - ئايدا مەكىت ناھىيسىنىڭ يانتاق يېزىسىدا ئوقۇتقۇچى ئائىلىسىدە تۇغۇلغان، 1969 - يىلدىن 1979 - يىلغىچە ئۆز يېزىسىدا باشلانغۇچ - ئوتتۇرا مەكتەپلەردە ئوقۇغان، 1980 - يىلى قەشقەر دارىلمۇئەللىمىننىڭ مەكتتىكى شۆبە سىنىپىغا ئوقۇشقا كىرگەن، 1981 - يىلى ئوقۇش پۈتتۈرگەندىن كېيىن ئىلگىرى - ئاخىر بولۇپ ئۆز يېزىسىدىكى باشلانغۇچ مەكتەپتە ئوقۇتقۇچى، يېزىلىق ئىتتىپاق كومىتېتىنىڭ شۇجىسى، ناھىيلىك رادىئو ئۇزېلىدا دىكتور بولۇپ ئىشلىگەن؛ 1985 - يىلى قەشقەر خەلق رادىئو ئىستانىسىغا يۆتكىلىپ كېلىپ دىكتورلۇق قىلغان، 1988 - يىلدىن تارتىپ قەشقەر ۋىلايەتلىك ئەدەبىيات - سەنئەتچىلەر بىرلەشمىسىنىڭ كەسپىي يازغۇچىسى بولغان، 1994 - يىل 8 - ئايدىن تارتىپ تەڭرىتاغ كىنو ستودىيىسىنىڭ كەسپىي ئىجادىيەتچىسى بولۇپ ئىشلەۋاتىدۇ. ئەختەم ئۆمەرنىڭ ئەدەبىي ئىجادىيەت پائالىيىتى 1981 - يىلى <شىنجاڭ ئۆسمۈرلىرى> گېزىتىدە ئېلان قىلىنغان <بىزنىڭ شۇجى> ناملىق ھېكايىسى بىلەن باشلانغان. ئۇ، شۇنىڭدىن تارتىپ <ھېلىقى يەر> قاتارلىق نەچچە ئون پارچە ھېكايە، <ئاھ، رەھىمسىز دەريا>، <زېمىن قارا ئادەملەرىڭگە>، <قىيامەتتە قالغان سەھرا>، <قۇرتلاپ كەتكەن كۆل>، <تاش مۇنار> قاتارلىق پوۋېسىتلارنى يېزىپ، كىتابخانلارنىڭ ياخشى باھاسىغا ئېرىشكەن. ئەختەم ئۆمەر مول ھوسۇللۇق يازغۇچى. ئۇ، پروزىدىن باشقا ساھەلەردىمۇ قەلەم تەۋرىتىپ، <ئۇر توقماق>، <سىرتماق>، <قارا باسقان كېچە> قاتارلىق رادىئو درامىسى ۋە درامىلارنى؛ <گۆلەخ بالىسى>، <توغراقنىڭ رىۋايىتى> قاتارلىق بىر قىسىم ئەدەبىي ئاخباراتلارنى، <يىراق قىرلاردىن ئانا يەرگە سالام> ناملىق چوڭ ھەجىملىك زىيارەت خاتىرىسىنى، <ئۆزىمىزنى تونۇيلى>، <ئۆلگەندىن كېيىن ياسىن ئوقۇمدۇق ياكى تىرىك چېغىدا پەرۋىش قىلامدۇق> قاتارلىق پوبلىستىك ماقالىلەرنى، <دولان مەشرىپىنىڭ دراماتىك ئالاھىدىلىكى توغرىسىدا>، <يازغۇچى بولمىسا بولمايدۇ> قاتارلىق ئىلمىي، ئەدەبىي ماقالىلەرنى ئېلان قىلغان. ئەختەم ئۆمەرنىڭ ھازىرغىچە نەشر قىلىنغان ئەسەرلىرىدىن <ئاھ، رەھىمسىز دەريا> (1986 - يىل، قەشقەر ئۇيغۇر نەشرىياتى) ناملىق پوۋېستلار توپلىمى، <قىيامەتتە قالغان سەھرا> (1989 - يىل، شىنجاڭ ياشلار - ئۆسمۈرلەر نەشرىياتى) ناملىق پوۋېسىت، ھېكايە، نەسرلەر توپلىمى، <تۇنجى ئاخشام> (1992 - يىل، شىنجاڭ خەلق نەشرىياتى)، <سۆيگۈ قەدرى> (1994 - يىل، مىللەتلەر نەشرىياتى) ناملىق ھېكايىلار توپلاملىرى، <يىراق قىرلاردىن ئانا يەرگە سالام> (1994 - يىل، مىللەتلەر نەشرىياتى) ناملىق ئەسىرى قاتارلىقلار بار. <يىراق قىرلاردىن ئانا يەرگە سالام> ناملىق ئەسەرنىڭ ئۈنئالغۇ لېنتىسى 1994 - يىل شىنجاڭ ئۈن - سىن نەشرىياتى تەرىپىدىن نەشر قىلىنغان. ئەختەم ئۆمەر ھازىر 2 - دەرىجىلىك كەسپىي ئىجادىيەتچى، جۇڭگو ئاز سانلىق مىللەت يازغۇچىلىرى ئىلمىي جەمئىيىتىنىڭ، شىنجاڭ يازغۇچىلار جەمئىيىتىنىڭ ئەزاسى.