—参考资料
ئەخمەق پادىشاھ
ئۇيغۇر خەلق چۆچەكلىرى
ئۆتكەن زاماندا بىر ئەخمەق پادىشاھ بولغان ئىكەن، ئەخمەقلىقىدىن پۇقراسىغا ھەددى - ھېسابسىز زۇلۇم سالىدىكەن، كىشىلەر ئۇنىڭ زۇلمىدىن قورقۇپ، نېمە بۇيرىسا شۇنى قىلىدىكەن. كۈنلەرنىڭ بىرىدە بۇ پادىشاھ بىر ئادەمگە يولۇقۇپ:
سەن نېمە قىلىدىغان ئادەم؟ - دەپ سوراپتۇ. ئۇ ئادەم قورقۇپ كېتىپ:
- مەن تاغ كۆتۈرىدىغان ئادەم، - دەپ جاۋاب بېرىپتۇ.
- ئۇنداق بولسا، ئوردىنىڭ ئالدىدىكى تاغنى يۆتكە، - دەپتۇ پادىشاھ.
- ماقۇل، - دەپتۇ ئۇ ئادەم.
- ساڭا نېمە لازىم؟ - دەپ سوراپتۇ پادىشاھ.
- ماڭا ھېچنەرسە لازىم ئەمەس، - دەپتۇ ئۇ ئادەم، - پەقەت يىلىغا بىرلا قېتىم تاغ كۆتىرىمەن، شۇڭغىچە يەتكىدەك كىيىم - كېچەك، يىمەك - ئىچمەك يەتكۈزۈپ بەرسىلە بولىدۇ.
- نېمە يېسەڭ نېمە كېيسەڭ ئىختىيار ئۆزەڭدە، ئوردىدىن يەتكۈزۈپ بېرىدۇ، - دەپتۇ پادىشاھ.
ئۇ ئادەم شۇنداق قىلىپ، بىر يىل پادىشاھنىڭ كىيىملىرىنى كىيىپ، تاماقلىرىنى يەپ يۈرۈپتۇ. يىل توشقاندىن كېيىن، پادىشاھ پۈتۈن يۇرتنى ئوردا ئالدىغا يىغىدۇرۇپ:
- ھازىر تاغ كوتىرىدىغان باتۇرنىڭ كۈچىنى كۆرۈڭلار! - دەپتۇ. يۇرت ئەھلى كۆز تىكىپتۇ. پادىشاھ باتۇرغا:
- قېنى، تاغنى كۆتەر! - دەپتىكەن، ھېلىقى ئادەم تاغنىڭ باغرىغا يۈگۈرۈپ بېرىپ، تاغقا دۇمبىسىنى يۈلەپ تۇرۇپتۇ.
- كۆتەر !... - دەپتۇ پادىشاھ يەنە. ھېلىقى ئادەم:
- سىلى باشلىق ھەممەيلەن كېلىپ، تاغنى دۈمبەمگە ئېلىپ قويۇڭلار، ئاندىن كېيىن كۆتىرەي، - دەپتۇ.
- بىز قانداق يۈلەيمىز؟ - دەپتۇ پادىشاھ.
- سىلەر توپلىشىپ يۆلەلمىگەن تاغنى مەن يالغۇز قانداق كۆتىرىمەن؟ - دەپتۇ ھېلىقى ئادەم.
يۇرت ئالدىدا پادىشاھ لەت بوپتۇ.
